چیئرمین پی پی پی بلاول بھٹو زرداری نے کہا ہے کہ پاکستان پیپلزپارٹی ہر محاذ پر وسیب کا مقدمہ لڑتی رہے گی۔

تفصیلات کے مطابق مظفر گڑھ سے منتخب رکن قومی اسمبلی مہر ارشاد سیال نے بلاول ہاؤس میں چیئرمین پی پی پی بلاول بھٹو زرداری سے ملاقات کی ہے۔

ملاقات میں چیئرمین بلاول بھٹو زرداری کو مہر ارشاد سیال نے ضلع مظفر گڑھ میں عوامی مسائل کی صورت حال سے آگاہ کیا جبکہ جنوبی پنجاب سیکریٹریٹ کے حکومتی جھانسے پر وسیب کے عوام کے غم و غصے سے بھی آگاہ کیا۔

چیئرمین پی پی پی نے کہا کہ بھٹوازم سے وفا کرنے والے مظفرگڑھ کے عوام مجھے عزیز ہیں، پی ٹی آئی کی حکومت نے مظفرگڑھ سمیت پورے جنوبی پنجاب کے مسائل کو نظرانداز کیا۔

بلاول بھٹو زرداری نے یہ بھی کہا کہ جب تک جنوبی پنجاب صوبہ نہیں بنے گا وسیب کے مسائل ترجیحی بنیادوں پر حل نہیں ہوسکتے۔

چیئرمین پی پی پی بلاول بھٹو زرداری نے مزید کہا کہ عمران خان آج تین سال بعد بھی جنوبی پنجاب صوبے کے قیام کے اپنے وعدے کی تکمیل نہ کرسکے، پاکستان پیپلزپارٹی ہر محاذ پر وسیب کا مقدمہ لڑتی رہے گی