معاون خصوصی برائے سیاسی ابلاغ ڈاکٹر شہباز گِل نے کہا ہے کہ اب ہر مجرم کی سرجری پاکستان میں ہی ہوگی۔

تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے مریم نواز کے بیان پر ردعمل دیتے ہوئے کہا کہ میاں مفرور بھی عوام کے سامنے باہر نہ جانے کے بلند و بانگ دعوے کرتے رہے اور جب این آر او نہ ملا تو جھوٹی بیماری کا سہارا لے کر سرپٹ بھاگے۔

معاون خصوصی برائے سیاسی ابلاغ نے کہا کہ والد کی طرح آپکو بھی پچھلے کچھ عرصے سے چھوٹی سی سرجری کی ضرورت محسوس ہو رہی ہے، مگر اب ہر مجرم کی سرجری پاکستان میں ہی ہوگی۔

ڈاکٹر شہباز گِل نے یہ بھی کہا کہ عمران خان نے کورونا کے باوجود غریب ترین طبقے کو بھی بنیادی سہولیات دینے کا وعدہ پورا کیا۔

معاون خصوصی برائے سیاسی ابلاغ ڈاکٹر شہباز گِل نے مزید کہا کہ ماضی میں غریب کو بنیادی سہولیات دینے کے جھوٹے وعدے کیے جاتے رہے جبکہ وزیراعظم نے نہ صرف غریب کو سہارا دیا بلکہ ڈوبتی معیشت کو بھی سنبھالا۔