تصاویر اور ویڈیو شیئرنگ ایپ انسٹا گرام نے ’ہائیڈ لائیک‘ فیچر پر کام شروع کردیا ہے جس کے تحت صارفین اپنے  ’لائیک کاؤنٹ‘ کو چھپا سکتے ہیں۔

ٹیکنالوجی کی ویب سائٹ ’ ٹیک کرنچ‘ کا کہناہے کہ اس نئے فیچر میں صارفین اس بات کا انتخاب بھی کرسکتے ہیں کہ آیا وہ کسی دوسرے صارف کی پوسٹ پر موجود لائیک کاؤنٹ کو دیکھنا چاہتے ہیں یا نہیں۔

اکثرصارفین اپنی پوسٹ پرلائیک کی تعداد دیکھ کر ذہنی دباؤ کا شکار ہوجاتے ہیں۔ انسٹاگرام کے اس فیچر کا مقصد صارفین کی تشویش اور شرمندگی کو کم کرنا ہے۔

خیال رہے کہ 2019 میں بھی انسٹا گرام نے اس فیچر کی آزمائش شروع کی تھی جوکہ محدود صارفین اور منتخب خطوں میں کیا گیا تھا ، تاہم کورونا کے بعد کی بدلتی ہوئی صورتحال کی وجہ سے کمپنی نے اپنی توجہ دیگر اہم فیچرز پر مرکوز کر دی تھی۔

ابتداء میں ’ہائیڈ لائیک‘ صارف کو صرف اتنی اجازت دیتا تھا کہ وہ وہ دوسرے صارف کے لائیک کاؤنٹ کو دیکھنا چاہتا ہے یا نہیں۔ لیکن اب کمپنی صارفین کو یہ آپشن دے رہی ہے کہ وہ اپنے لائیک کاؤنٹ کو دیکھنا اور ظاہر کرنا چاہتا ہے یا نہیں ۔

رپورٹس کے مطابق فیس بک بھی اپنے سوشل میڈیا پلیٹ فارم پر اسی نوعیت کے فیچر کی آزمائش کر رہا ہے۔