عوامی نیشنل پارٹی (اے این پی) کے سربراہ اسفند یار ولی خان نے کہا ہے کہ موجودہ حکومت نے پارلیمنٹ، عدلیہ، قانون، آئین اور اداروں کو مذاق بنا کر رکھ دیا ہے۔

تفصیلات کے مطابق عوامی نیشنل پارٹی (اے این پی) کے سربراہ اسفند یار ولی خان نے اپنے بیان میں کہا کہ سپریم کورٹ کے معزز اراکین کا فیصلہ خوش آئند ہے، پاکستان کی تاریخ میں پہلی بار عدالت عظمیٰ کا معزز جج اپنے لئے انصاف مانگ رہا ہے۔

اسفند یار ولی خان نے یہ بھی کہا کہ آج کے فیصلے نے ایک بار پھر ثابت کردیا کہ پاکستان میں حق کیلئے کھڑا ہونا اور لڑنا ایک مشکل عمل ہے۔

عوامی نیشنل پارٹی (اے این پی) کے سربراہ کا کہنا تھا کہ احتساب کے نام پر ڈرامہ مزید نہیں چلے گا، ڈھائی سال میں حکومت کی کارکردگی صفر رہی اور اگر واقعی احتساب کرنا ہے تو شروع عمران خان سے کریں۔

اسفند یار ولی خان کا یہ بھی کہنا تھا کہ ملک میں انصاف کا بول بالا ہوگا تو ہی ملک ترقی کی راہ پر گامزن ہوگا۔

عوامی نیشنل پارٹی (اے این پی) کے سربراہ اسفند یار ولی خان کا مزید کہنا تھا کہ موجودہ حکومت نے پارلیمنٹ، عدلیہ، قانون، آئین اور اداروں کو مذاق بنا کر رکھ دیا ہے، جب تک بلاامتیاز احتساب نہیں ہوگا تب تک نیب نیازی گٹھ جوڑ جاری رہے گا۔