وزیراعلیٰ پنجاب سردار عثمان بزدار نے کہا ہے کہ ترقیاتی منصوبوں میں شفافیت اور مدت تکمیل کی پابندی کو مدنظر رکھا جائے۔

تفصیلات کے مطابق وزیراعلیٰ پنجاب سردار عثمان بزدار کی ڈپٹی چئیرمین پلاننگ کمیشن محمد جہانزیب خان سے ملاقات ہوئی جس میں رواں مالی سال کے وفاقی پی ایس ڈی پی بجٹ سے پنجاب میں میگا پراجیکٹس کا جائزہ لیا گیا۔

ملاقات میں فیڈرل پی ایس ڈی پی سے پنجاب کے ترقیاتی منصوبوں کی تکمیل کی پیش رفت پرغور کیا گیا جبکہ منصوبوں کو مقررہ مدت میں تکمیل کرنے پر بھی تبادلہ خیال کیا گیا۔

ملاقات میں وفاق اور پنجاب کے درمیان ترقیاتی منصوبوں پر اشتراک کار اور روابط بہتر بنانے کی ضرورت پر زور دیا گیا۔

اس موقع پر محمد جہانزیب خان نے پنجاب میں وفاقی حکومت کے ذریعے جاری ترقیاتی منصوبوں خاص طور پر پنجاب میں نکاسی آب کے منصوبوں کی تکمیل میں رکاوٹوں کو دورکرنے کی یقین دہانی کروائی۔

ڈپٹی چئیرمین پلاننگ کمیشن محمد جہانزیب خان نے کہا کہ پی ایس ڈی پی بجٹ میں پنجاب کے عوام کی فلاح وبہبود کو مدنظر رکھتے ہوئے پنجاب حکومت میگاپراجکٹس کی شناخت کرے۔

ملاقات میں وزیراعلیٰ پنجاب سردار عثمان بزدار نے کہا کہ عوام کی ضروریات اور مسائل کو مدنظر رکھ کر ترقیاتی منصوبے کئے جائے جبکہ ملک کا سب سے بڑا صوبہ ہونے کے تحت پنجاب کو پی ایس ڈی پی میں زیادہ شیئر دینے کی بھی توقع کرتے ہیں۔