وزیراعلیٰ پنجاب سردار عثمان بزدار نے کہا ہے کہ شہریوں کی زندگیوں کا تحفظ پہلی ترجیح ہے۔

تفصیلات کے مطابق وزیراعلیٰ پنجاب سردار عثمان بزدار نے اپنے ایک بیان میں کہا کہ کورونا کی تیسری لہر خطرناک صورتحال اختیار کررہی ہے۔

سردار عثمان بزدار نے کہا کہ کورونا کے مریضوں اور شرح اموات میں اضافہ بے حد تشویشناک ہے، ماسک نہ پہننے والے دوسروں کیلئے بھی کورونا کے خطرے کا باعث بن رہے ہیں۔

وزیراعلیٰ پنجاب کا کہنا تھا کہ حکومت شہریوں کی زندگیوں کے تحفظ کیلئے مزید سخت اقدامات کرنے پر غور کررہی ہے، صورتحال مزید خراب ہوئی تو پابندیاں سخت کردیں گے۔

سردار عثمان بزدار کا یہ بھی کہنا تھا کہ شہری ماسک کو اپنی زندگی کا حصہ بنا لیں، حفاظتی تدابیر اختیار کرنا ہی کورونا وائرس سے نمٹنے کا موثر ذریعہ ہے۔

وزیراعلیٰ پنجاب سردار عثمان بزدار کا مزید کہنا تھا کہ کورونا میں شدت آنے سے پبلک ہیلتھ سسٹم پر دباؤ بڑھ رہا ہے، پابندیوں سے بچنے کے لئے عوام کو ایس او پیز پر من و عن عمل کرنا ہوگا۔