کورونا وائرس کے بڑھتے ہوئے کیسسز کے باعث قومی اسمبلی کی تمام تر سرگرمیاں جزوی طور پر معطل کر دی گئی ہیں۔

تفصیلات کے مطابق کورونا وائرس کے ممکنہ پھیلاؤ کو روکنے کے لئے قومی اسمبلی سیکرٹریٹ کے دفاتر کو 26 اپریل سے 30 اپریل تک 5 دنوں کے لئے بند کرنے کا فیصلہ کرلیا گیا ہے۔

قومی اسمبلی سیکرٹریٹ کے شعبہ انتظامیہ کی جانب سے جاری  کردہ نوٹیفیکیشن میں یہ ہدایت کی گئی ہے کہ ملازمین کو 26 اپریل سے 30 اپریل تک کام کو گھر سے  ہی  الیکٹرانک ذرائع سے جاری رکھنا ہے۔

جاری کردہ اعلامیے کے مطابق ضرورت پڑنے پر کسی بھی ملازم کو ایک گھنٹے کے نوٹس پر آفس بلایا جا سکتا ہے۔

تین مئی سے مختلف شعبہ جات کے انچارج محدود  ضرورت پڑنے پر اسٹاف کو آفس بلائیں گے تاہم ملازمین کو اسٹیشن چھوڑنے کی اجازت نہیں ہو گی۔

ان شعبہ جات میں شعبہ انتظامیہ، کمیٹی ونگ ،قانون سازی اور خصوصی اقدامات بھی شامل ہیں۔

قومی اسمبلی کی قائمہ ،پبلک اکاؤنٹس اور خصوصی کمیٹیوں کا  30 اپریل تک ہونے والا اجلاس بھی ری شیڈول کر دیا گیا ہے۔

سی ڈی اے کو یہ ہدایت کی گئی ہے کہ جراثیم کش ادویات سے تمام دفاتر کو ڈس انفیکٹ کریں۔ دوسری جانب عملے کو بھی ہدایت کی گئی ہے کہ کورونا وائرس کی علامات کی صورت میں فوری ٹیسٹ کروائیں۔

قومی اسمبلی سیکرٹریٹ میں داخل ہونے کے لئے ماسک کو لازمی قرار دے دیا گیا ہے۔