جہانگیرترین گروپ کے رہنما خرم لغاری نے کہا ہے کہ پی ٹی آئی ہمیں صرف اور صرف لولی پاپ دے رہی ہے۔

تفصیلات کے مطابق جہانگیرترین گروپ کے رہنما خرم لغاری نے بول نیوز کے پروگرام آج کی تازہ خبر میں گفتگو کرتے ہوئے کہا کہ حکومت میں رہتے ہوئے بھی ہم ذلیل ہورہے ہیں۔

جہانگیرترین گروپ کے رہنما نے کہا کہ پی ٹی آئی ہمیں صرف اور صرف لولی پاپ دے رہی ہے، پی ٹی آئی نے ہم سے کیا ہوا ایک بھی وعدہ پورا نہیں کیا۔

خرم لغاری نے یہ بھی کہا کہ میں نے مشیرکے عہدے سے استعفیٰ دینے کے بعد گروپ کو جوائن کیا۔

جہانگیرترین گروپ کے رہنما خرم لغاری نے مزید کہا کہ میں تو پارٹی چھوڑنے والا تھا لیکن عمران خان نے منع کردیا تھا۔عمران خان نے مسائل کےحل کی یقین دہانی کرائی توپارٹی نہیں چھوڑی۔

واضح رہے اس سے قبل وزیر اعظم عمران خان سے پی ٹی آئی کے ناراض رکن پنجاب اسمبلی خرم لغاری نے ملاقات کی تھی۔

ملاقات میں خرم لغاری نے وزیراعظم کو اپنے تحفظات سے آگاہ کیا تھا جس پر وزیراعظم نے مسائل حل کرانے کی یقین دہانی کرائی جس کے بعد خرم لغاری نے پارٹی چھوڑنے کا فیصلہ واپس لے لیا تھا۔

خیال رہے کہ رکن پنجاب اسمبلی خرم لغاری نے چند روز قبل پارٹی چھوڑنے کا اعلان کیا تھا اور کہا تھاکہ سینیٹ انتخابات میں وہ پارٹی امیدواروں کو ووٹ نہیں دیں گے۔