پاکستان مسلم لیگ (ن) کے صدر اور قومی اسمبلی میں قائدِحزب اختلاف شہباز شریف کی نیپالی سفیر سے ملاقات ہوئی جس میں شہباز شریف نے نیپال میں کورونا وباء کے باعث اموات پر افسوس اور تعزیت کی۔

ملاقات میں نیپال کے سفیر نے شہباز شریف کے سارک اور خطے کے لیے وژن اور ان کی تجاویز سے اتفاق کیا۔ نیپال کے سفیر نے شہباز شریف کے بطور وزیراعلیٰ پنجاب عوام کی خدمت کے جذبے اور کردار کو بھی سراہا۔

پاکستان مسلم لیگ (ن) کے صدر نے کہا کہ نیپال ہمیشہ پاکستان کے ساتھ کھڑا ہوا ہے جو انتہائی قابل قدر ہے۔

قومی اسمبلی میں قائدِحزب اختلاف نے یہ بھی کہا کہ تجارت، صنعت، سرمایہ کاری، سیاحت کے فروغ میں سارک اہم کردار ادا کر سکتی ہے۔

شہباز شریف نے مزید کہا کہ سارک کو یورپی یونین کی طرح تجارت، معیشت اور دیگر شعبوں میں تعاون اپنانا چاہیے۔ سارک کو اس مقصد کے حصول کے لیے زیادہ فعال اور متحرک کردار ادا کرنا ہوگا۔

پاکستان مسلم لیگ (ن) کے صدر اور قومی اسمبلی میں قائدِحزب اختلاف شہباز شریف نے مزید کہا کہ کورونا سے پاک جنوبی ایشیاء کے لئے چین کا تعاون اور تجربہ بہت مفید ثابت ہوسکتا ہے۔ تنازعات اور کشمکش کے باعث سارک تنظیم کے ثمرات خطے کے عوام کو نہیں مل پارہے۔