معاون خصوصی برائے سیاسی ابلاغ ڈاکٹر شہباز گِل نے کہا ہے کہ کرپٹ کردار سلامتی اداروں کی بدنامی کا باعث بن رہے ہیں۔

تفصیلات کے مطابق معاون خصوصی برائے سیاسی ابلاغ ڈاکٹر شہباز گِل نے مریم صفدر کے بیان پر ردعمل دیتے ہوئے کہا کہ جہاں شرمندہ ہونا ہو وہاں کلیبری کوئین اداکاری شروع کردیتی ہیں۔

معاون خصوصی برائے سیاسی ابلاغ نے کہا کہ آج مریم صفدر جعلی نظریاتی اور جعلی بہادر کے قصیدے سنا رہی ہیں، دشمن کے بیانیےکا پرچار کرنے والا بہادر نہیں بزدل ہے۔

ڈاکٹر شہباز گِل نے یہ بھی کہا کہ ایسی بہادری کا کیا کہنا جس کا آدھا خاندان اشتہاری اور مفرور ہو، سیاسی یتیم لیگ کیلئے آئین کا مطلب ن لیگ کی اقتدار میں شراکت داری ہے۔

معاون خصوصی برائے سیاسی ابلاغ ڈاکٹر شہباز گِل نے مزید کہا کہ ‏پاکستانی سیاست کے نام نہاد ٹھیکیداروں کا گند قوم کے سامنے آ رہا ہے، قرضے لیکر لندن فلیٹ اور سرے محل بنانے والے اصل مجرم ہیں۔

واضح رہے اس سے قبل پاکستان مسلم لیگ (ن) کی نائب صدر مریم نواز نے شیخوپورہ میں مسلم لیگ ن کے کارکنوں سے خطاب کرتے ہوئے کہا تھا کہ کوئی اگر اس ملک کو مشکلات سے نکال سکتا ہے تووہ صرف نوازشریف ہے۔

مریم نواز نے کہا تھا کہ نوازشریف کا سورج اب طلوع ہونے کو ہے، نوازشریف کوغدارکہنے والوں کا یوم حساب قریب ہے۔

پاکستان مسلم لیگ (ن) کی نائب صدر نے یہ بھی کہا تھا کہ غداری غداری کا کھیل بہت سالوں سے سنتے آرہے ہیں، اگر قانون، آئین اور حق کی بات کرنیوالا غدار ہے تو پھر پورا پاکستان غدار ہے۔