صوبائی وزیر صنعت و تجارت میاں اسلم اقبال نے کہا ہے کہ عید الفطر اللہ تعالیٰ کا مسلمانوں کے لئے خاص انعام اور تحفہ ہے۔

 تفصیلات کے مطابق صوبائی وزیر صنعت و تجارت میاں اسلم اقبال نے اہل وطن کو عید الفطر کی مبارکباد پیش کرتے ہوئے کہا کہ یہ دن اہل اسلام کے لئے محبت اور باہمی اتحاد کا پیغام لے کر آتا ہے۔

میاں اسلم اقبال نے کہا کہ وسائل سے محروم طبقات کو عید کی خوشیوں میں شامل کرنا ہمارا دینی، اخلاقی اور قومی فریضہ ہے۔

صوبائی وزیر صنعت و تجارت کا کہنا تھا کہ حکومت نے رمضان المبارک کے دوران عام آدمی کو ریلیف کی فراہمی کے لئے ساڑھے 5ارب روپے کا رمضان پیکج دیا، بے سہارا افراد کو عید کی خوشیوں میں شریک کرنا ہی اصل عید ہے۔

میاں اسلم اقبال کا یہ بھی کہنا تھا کہ پوری دنیا کی طرح پاکستان بھی کورونا کی شدید لہر کی لپیٹ میں ہے، ہمیں آج کے دن کورونا سے معاشی طور پرنقصان اٹھانے والے محنت کشوں کا بھی خیال رکھنا ہے۔

صوبائی وزیر صنعت و تجارت میاں اسلم اقبال کا مزید کہنا تھا کہ آج کے دن ملک کی سلامتی، ترقی و خوشحالی اور استحکام کیلئے خصوصی دعائیں کی جائیں۔ قوم عید سادگی سے منائے اور احتیاطی تدابیر کا دامن ہاتھ سے نہ چھوڑے، انسدادِ کورونا کے حوالے سے ہر فرد ایس اوپیز پر عمل کرکے اپنی ذمہ داری نبھائے