سابق آسٹریلوی کرکٹراسٹیورٹ میکگل کو گزشتہ ماہ ایک گھنٹے کیلئے مبینہ طور پر اغواء کیا گیا۔

تفصیلات کے مطابق 44 ٹیسٹ اور تین ایک روزہ میچز کھیلنے والے آسٹریلیا کے کھلاڑی اسٹیورٹ میکگل کو مبینہ طور پر اغواء کر کے ایک گھنٹہ بعد چھوڑدیا گیا ،واقعہ 14 اپریل کو سڈنی کے نواح میں پیش آیا تھا۔

رپورٹ کے مطابق اسٹیورٹ میکگل کو سڈنی میں تاوان کے لئے اغواء کیا گیا، اس دوران ان کو تشدد کا نشانہ بھی بنایا گیا، تاہم اس واقعے سے متعلق ابھی تک آسٹریلیوی کھلاڑی کا کوئی بیان سامنے نہیں آیا۔

بعد ازاں پولیس نے کارروائی کے بعد چار اغواکاروں کو گرفتار کرکے جیل بھجوادیا ہے۔

واضح  رہے 50 سالہ اسٹیورٹ میکگل نے 1998 سے 2008 تک آسٹریلیا کی انٹرنیشنل کرکٹ میں نمائندگی کی۔