صدر مملکت ڈاکٹر عارف علوی نے کہا ہے کہ وفاقی حکومت واٹر سپلائی منصوبے کی بروقت تکمیل کے لئے واپڈا کو ہر ممکن مدد فراہم کرے گی۔

تفصیلات کے مطابق صدر مملکت ڈاکٹر عارف علوی کی زیر صدارت کے فور منصوبے کے حوالے سے اہم اجلاس ہوا جس میں صدر عارف علوی کو چئیرمین واپڈا اور لیفٹیننٹ جنرل (ر) مزمل حسین نے “کے فور” منصوبے پر بریفنگ دی۔

چیئرمین واپڈا نے کراچی میں پانی کی موجودہ اور مستقبل کی ضروریات پر تفصیلی بریفنگ دیتے ہوئے کہا کہ جون 2021 تک  کنسلٹنٹ متحرک اور ڈیزائن ریویو اکتوبر 2021 تک مکمل کرلیا جائے گا اور منصوبے پر فروری 2022ء میں کام شروع ہوگا ، منصوبہ اکتوبر 2023ء میں مکمل ہوگا۔

صدر مملکت ڈاکٹر عارف علوی نے اجلاس کی صدارت کرتے ہوئے کہا کہ کراچی کو پانی کی شدید قلت کا سامنا ہے ، منصوبہ تیز رفتار بنیادوں پر چلانے کی ضرورت ہے۔

ڈاکٹر عارف علوی نے یہ بھی کہا کہ واپڈا کراچی کی آبی ضروریات پوری کرنے کیلئے “کے فور” منصوبہ مقررہ وقت پر مکمل کرنے کیلئے کوششیں تیز کرے۔

صدر مملکت ڈاکٹر عارف علوی نے مزید کہا کہ متعلقہ اسٹیک ہولڈرز”کے فور” منصوبے کی جلد تکمیل کیلئے ہم آہنگی سے کام کریں، وفاقی حکومت واٹر سپلائی منصوبے کی بروقت تکمیل کے لئے واپڈا کو ہر ممکن مدد فراہم کرے گی۔

اجلاس میں گورنر سندھ عمران اسماعیل، چئیرمین واپڈا اور لیفٹیننٹ جنرل (ر) مزمل حسین اور وفاقی حکام نے شرکت کی۔