صوبائی وزیر قانون راجہ بشارت نے کہا ہے کہ عید کے موقع پر لوگوں کی زیادہ نقل و حرکت کے باعث کورونا کیسز میں اضافے کا خطرہ ہے۔

تفصیلات کےمطابق صوبائی وزیر قانون راجہ بشارت کی زیر صدارت سول سیکرٹریٹ میں کورونا وباء کی صورتحال کا جائزہ لینے کے لئے اعلیٰ سطحی اجلاس ہوا ہے۔

راجہ بشارت نے کہا کہ شہری احتیاطی تدابیر پر عمل کر کے وائرس کے پھیلاؤ کو روکنے کے لئے حکومتی کوششوں کا ساتھ دیں۔

انہوں نے کہا کہ لوگ خود کو اور اپنے عزیز و اقارب کو کورونا وباء سے محفوظ رکھنے کے لئے حکومتی گائیڈ لائنز پر عمل کریں۔

ڈاکٹر یاسمین راشد کا کہنا تھا کہ عوام نے اگر لاک ڈاؤن کے دوران ایس او پیز پر عمل کیا تو کیسز میں نمایاں کمی آئے گی ،لوگ عید سادگی سے منائیں اورغیر ضروری سفر سے گریز کریں۔

چیف سیکرٹری پنجاب نے کہا کہ گزشتہ برس عید الفطر کے تجربے کو مدنظر رکھتے ہوئے لاک ڈاؤن کا فیصلہ کیا گیا ہے تاہم نماز عید کے اجتماعات ایس او پیز کے تحت ہوں گے۔

چیف سیکرٹری نے یہ بھی کہا کہ  ماسک پہننے، سماجی فاصلہ رکھنے اور دیگر احتیاطی تدابیر پر عمل کر کے وباء سے بچا جا سکتا ہے جبکہ عید کے موقع پر لوگوں کی نقل و حرکت محدود رکھنے کے لئے لاک ڈاؤن پر سختی سے عملدرآمد کا فیصلہ کیا ہے ۔

اجلاس میں بریفنگ دی گئی کہ عید الفطر کی نماز کے اجتماعات کے لئے ایس او پیز تیار کر لئے گئے ہیں جبکہ  گزشتہ روز مختلف شہروں میں 1200 سے زائد دکانوں کو سیل کیا گیا ہے۔

اجلاس میں صوبائی وزیر ڈاکٹر یاسمین راشد ،چیف سیکرٹری پنجاب ،ایڈیشنل چیف سیکرٹری، ایڈیشنل چیف سیکرٹری داخلہ، صحت کے محکموں کے سیکرٹریز، ڈی جی پی آر اور اعلیٰ سول وعسکری حکام نے بھی شرکت کی ہے۔