وزیر خارجہ شاہ محمود قریشی  نے کہا ہے کہ فلسطین ہماری خارجہ پالیسی کا اہم ستون ہے۔

تفصیلات کے مطابق وزیر خارجہ شاہ محمود قریشی نے اجلاس کے بعد میڈیا سے گفتگو کرتے ہوئے کہا کہ او آئی سی ایگزیکٹو کمیٹی کا ہنگامی اجلاس بلانے پر سعودی عرب کے شکر گزار ہیں۔

وزیر خارجہ نے کہا کہ فلسطین میں جارحیت پر عالمی برادری فوری حرکت میں آئے ، فلسطین میں اسرائیلی جارحیت کی جتنی مذمت کی جائے کم ہے۔

شاہ محمود قریشی نے یہ بھی کہا کہ اسرائیل بین الاقوامی قوانین کی دھجیاں اڑا رہا ہے، رمضان میں نہتے فلسطینیوں پر بدترین تشدد کیا گیا، اسرائیل طاقت کے استعمال کو فوری بند کرے۔

وزیر خارجہ کا کہنا تھا کہ فلسطین میں بچوں، خواتین اور بزرگوں کو نشانہ بنایا گیا، اسرائیل کو انسانیت کے خلاف جرائم کرنے سے روکا جائے۔

شاہ محمود قریشی کا یہ بھی کہنا تھا کہ اسرائیلی جارحیت ناقابل برداشت ہے، پاکستان ہر فورم پر مظلوم فلسطینیوں کے لئے آواز بلند کرے گا۔

وزیر خارجہ نے کہا کہ اسرائیل نے فلسطین میں میڈیا ہاؤسز کو بھی نشانہ بنایا، اسرائیلی مظالم کے خلاف مسلم امہ کا اتحاد وقت کا تقاضا ہے۔

شاہ محمود قریشی نے یہ بھی کہا کہ جارحیت کرنے والے اسرائیل اور مظلوم فلسطینیوں کو ایک صف میں نہ کھڑا کیا جائے۔ عالمی برادری، اسرائیلی جارحیت روکنے کیلئے اپنا کردار ادا کرے۔

وزیر خارجہ شاہ محمود قریشی نے مزید کہا کہ فلسطین ہماری خارجہ پالیسی کا اہم ستون ہے۔اس مشکل گھڑی میں ہم فلسطینی قوم کےساتھ کھڑے ہیں،مشکل گھڑی میں فلسطینی عوام کو تنہا نہیں چھوڑیں گے۔