چیئرمین پبلک اکاؤنٹس کمیٹی رانا تنویر حسین نے کہا ہے کہ پیپلزپارٹی دھاندلی کرنے میں بڑی ماہر ہے۔

تفصیلات کے مطابق چیئرمین پبلک اکاؤنٹس کمیٹی رانا تنویر حسین نے پاکستان کے نمبر 1 نیوز چینل بول نیوز کے پروگرام ’’بس بہت ہوگیا ‘‘ میں گفتگو کرتے ہوئے کہا کہ حلقے کے ماحول سے بھی پتہ چل جاتا ہے کہ کونسی جماعت جیت رہی ہے۔

رانا تنویر نے کہا کہ این اے 249 میں پیپلزپارٹی نے بڑے ماہر طریقے سے دھاندلی کی ہے جبکہ این اے 249 میں ن لیگ سب سے آگے تھی۔

رانا تنویر کا کہنا تھا کہ ڈسکہ میں پی ٹی آئی نے اناڑیوں کی طرح دھاندلی کی کوشش کی ہے جبکہ ن لیگ شروع دن سے کہہ رہی ہے کہ ملک میں صاف  اور شفاف الیکشن ہونےچاہئیے۔

چیئرمین پبلک اکاؤنٹس کمیٹی رانا تنویر حسین نے مزید کہا کہ حکومت الیکشن ریفارمز پر اپوزیشن سے بات کیوں نہیں کرتی حالانکہ ن لیگ اور پیپلزپارٹی نے بھی الیکشن ریفارمز پر کام کیا ہوا ہے۔