آل پاکستان انجمن تاجران کے صدر اجمل بلوچ نے چاند رات تک کاروبار کرنے کا اعلان کردیا ہے۔

تفصیلات کے مطابق اپنے ایک بیان میں آل پاکستان انجمن تاجران کے صدر اجمل بلوچ نے 8 تا 16 مئی کاروبار بند کرنے کا حکومتی نوٹیفکیشن مسترد کردیا ہے۔

اجمل بلوچ نے کہا کہ کورونا روکنے کے لئے حکومت زیادہ ٹائم دے تاکہ رش ختم ہوجائے۔

آل پاکستان انجمن تاجران کے صدر اجمل بلوچ نے مزید کہا کہ حکومت کے غلط فیصلے سے جتنا کورونا وائرس پھیلنا تھا وہ 2 دنوں میں پھیل چکا ہے، تاجر برادری چاند رات تک کاروبار جاری رکھے گی۔

واضح رہے کہ اس سے قبل نیشنل کمانڈ اینڈ آپریشن سینٹر (این سی او سی) نے8 سے 16 مئی کے دوران تمام کاروباری مراکز اور دکانیں بند رکھنے کا فیصلہ کیا تھا۔

این سی او سی کا کہنا تھا کہ 8 سے 16 مئی کے دوران لوکل اور بیرون ممالک کے سیاحوں کے لئے بھی سیاحت پر مکمل پابندی ہوگی ۔ضلعی سطح پر تشکیل دی گئی مانیٹرنگ ٹیمیں ایس او پیز کے عمل درآمد کو یقینی بنائیں گی۔

ترجمان این سی او سی کا یہ بھی کہنا تھا کہ پٹرول پمپس، میڈیکل سٹورز، گروسری سٹورز، بیکری اور فوڈ آئٹمز کی دکانوں کو استثنیٰ حاصل ہوگا۔

این سی او سی کے مطابق تمام سیاحتی مقامات، ہوٹلز،شاپنگ مالز، پارکس اور ریسٹورنٹ بند رہیں گے جبکہ شمالی علاقہ جات اور سی ویو کی طرف جانے والے تمام ٹریول نوڈز پر بھی پابندی ہوگی۔

نیشنل کمانڈ اینڈ آپریشن سینٹر (این سی او سی) نے مزید کہا تھا کہ گلگت بلتستان اور آزاد کشمیر کے رہائشیوں کو واپس جانے کی اجازت ہوگی۔