پاکستان شوبز انڈسٹری کی اداکارہ ثانیہ شمشاد کے ہاں ننھے مہمان کی آمد متوقع ہے۔

اداکارہ ثانیہ شمشاد نے فوٹو اینڈ ویڈٰو شیئرنگ ایپ انسٹاگرام پر اپنے شوہر کے ہمراہ تصاویر شیئر کرتے ہوئے بتایا کہ ان کے ہاں رواں برس جولائی میں ننھے مہمان کی آمد متوقع ہے۔

اداکارہ نے انسٹاگرام پر پوسٹ کی جانے والی تصویر کے کیپشن میں لکھا کہ پچھلے کچھ عرصے سے ہم نے ایک راز چھپایا ہوا تھا اب وقت آگیا ہے کہ آپ سب کو اس راز کے بارے میں آگاہ کیا جائے۔

ثانیہ شمشاد نے لکھا کہ اللہ ہمیشہ ہی ہم پر مہربان رہا ہے اور نوازنے کے مختلف طریقے اپناتا رہا ہے جو ہماری سوچ سے بھی بالاتر رہے ہیں۔

انہوں نے کہا کہ اس زندگی بدل دینے والے تحفے کیلئے ہم اللہ کے شکرگزار ہیں۔

اداکارہ کی پوسٹ پر مداحوں کی جانب سے نیک خواہشات کا اظہار کیا جا رہا ہے۔

واضح رہے کہ ثانیہ شمشاد 2019 میں رشتۂ ازدواج میں منسلک ہوئی تھیں۔