معاون خصوصی برائے صحت ڈاکٹر فیصل سلطان نے کہا ہے کہ سائینو فام کو بند کرنے کی خبریں بے بنیاد ہیں۔

تفصیلات کے مطابق معاون خصوصی برائے صحت ڈاکٹر فیصل سلطان نے اپنے ایک بیان میں کہا کہ تازہ اعدادو شمار کے مطابق ایس او پیز پر عملدر آمد سے کیسز میں کمی ہوئی ہے اور ایس اوپیز پر عملدر آمد کرنے پر عوام کے مشکور ہیں تاہم ابھی بھی احتیاطی تدابیر پر عمل کرنا ہے۔

ڈاکٹر فیصل سلطان نے کہا کہ عوام سے گزارش ہے ویکسینیشن ضرورکروائیں۔

انہوں نے یہ بھی کہا کہ این سی او سی کے اقدامات کے باعث کیسز میں کمی آئی ہے۔

معاون خصوصی برائے صحت کا کہنا تھا کہ ماسک کے استعمال اور کورونا ایس او پیز پرعملدر آمد جاری رکھنا ہے۔

فیصل سلطان نے کہا کہ 40 سے زائد عمر کے افراد کی 12 مئی سے کورونا ویکسینیشنز جاری ہیں اور سائینو فام بھی ویکسین سینٹرز پر دستیاب ہیں۔

معاون خصوصی برائے صحت ڈاکٹر فیصل سلطان نے مزید کہا کہ جنھیں سائینو فام کی پہلی ڈوز لگی ہے ان کو دوسری ڈوز بھی لگے گی۔