وزیراعلیٰ پنجاب کی معاون خصوصی برائے اطلاعات فردوس عاشق اعوان نے کہا ہے کہ عوام کی پریشانی کا احساس ہے لیکن ایس اوپیز پر عمل کرنا ہوگا۔

تفصیلات کے مطابق وزیراعلیٰ پنجاب کی معاون خصوصی برائے اطلاعات فردوس عاشق اعوان نے سیالکوٹ میں میڈیا سے گفتگو کرتے ہوئے کہا کہ کورونا سے بچاؤ کے لئے اور عوام کی جانوں کو محفوظ بنانے کے لئے حکومت نے لاک ڈاؤن لگایا۔

وزیراعلیٰ پنجاب کی معاون خصوصی برائے اطلاعات نے کہا کہ عوام کی عید پر روایتی خوشیاں پھیکی پڑگئی ہیں لیکن حکومت نے لاک ڈاؤن لگا کر آپ کی جانوں کو تحفظ فراہم کیا ہے۔

 فردوس عاشق اعوان نے یہ بھی کہا کہ روزانہ کی بنیاد پر قیمتی جانوں کا ضیاع اس وائرس کے مہلک ہونے کی نشاندہی کر رہا ہے۔پڑوسی ملک میں اس مہلک وائرس نے تباہی مچا رکھی ہے۔

وزیراعلیٰ پنجاب کی معاون خصوصی برائے اطلاعات کا کہنا تھا کہ لاک ڈاؤن میں تمام دکانیں بند ہوگئیں ہیں اب اپوزیشن بھی چند روز کے لئے اپنی سیاسی دکانیں بند کردیں۔

فردوس عاشق اعوان کا یہ بھی کہنا تھا کہ عوام کی پریشانی کا احساس ہے لیکن ایس اوپیز پر عمل کرنا ہوگا۔ڈنڈے کے زور پر بھی ایس او پیز پر عمل کروایا جاسکتا ہے لیکن ایسا کرنا نہیں چاہتے۔

وزیراعلیٰ پنجاب کی معاون خصوصی برائے اطلاعات فردوس عاشق اعوان کا مزید کہنا تھا کہ وزیر اعظم عمران خان نے پولٹری مافیا کا مقابلہ کرنے کے لئے اسے ریگولیٹ کرنے کا فیصلہ کیا ہے،چینی مافیا کو کنٹرول کرنے کے لئے جونظام لائے تھے وہی پولٹری پر لاگو کریں گے۔