وزیر جیل خانہ جات پنجاب فیاض الحسن چوہان نے کہا ہے کہ وزیر اعظم کی قیادت میں پاکستان ترقی کی طرف گامزن ہے۔

تفصیلات کے مطابق وزیر جیل خانہ جات پنجاب فیاض الحسن چوہان نے بیگم صفدر اعوان کے بیان پر ردعمل دیتے ہوئے کہا کہ اس وقت بیگم صفدر کی حالت “نہ خدا ہی ملا نہ وصال صنم” کے مترادف ہے۔

فیاض الحسن چوہان نے کہا کہ شریف خاندان سمیت پی ڈی ایم کا شیرازہ بکھر چکا، بیگم صفدر اعوان طفل تسلیوں سے اپنا دل بہلا رہی ہیں۔

وزیر جیل خانہ جات پنجاب نے یہ بھی کہا کہ فرار کی ناکام کوشش کے بعد شوباز شریف اپنی مردہ سیاست کو زندہ کرنے کی کوشش میں ہیں۔

فیاض الحسن چوہان کا کہنا تھا کہ ڈیڑھ جماعت پر مشتمل پی ڈی ایم کی سیاسی نابالغ بیگم صفدر اعوان پیپلز پارٹی سے جواب طلب کر رہی ہیں۔ پی ڈی ایم کے مردہ گھوڑے میں جان ڈالنے کی کوششیں بیکار جائیں گی۔

وزیر جیل خانہ جات پنجاب کا یہ بھی کہنا تھا کہ موڈیز کی پاکستانی معیشت کی شرح نمو کے حوالے سے رپورٹ لیگی بیانیہ کے منہ پر طمانچہ ہے۔

فیاض الحسن چوہان نے کہا کہ وزیر اعظم عمران خان کی کوششوں کا ثمر ملکی شرح نمو میں 4 فیصد اضافے کی صورت میں نظر آنے لگا ہے۔

وزیر جیل خانہ جات پنجاب فیاض الحسن چوہان نے مزید کہا کہ وزیر اعظم عمران خان کی قیادت میں پاکستانی معیشت استحکام کے ساتھ پائیدار ترقی کی طرف گامزن ہے۔