پاکستان شوبز انڈسٹری کی معروف ماڈل زارا عابد کی پہلی برسی پر شوبز انڈسٹری کی معروف اداکارہ نیلم منیر رنجیدہ ہوگئیں۔

خوبرو اداکارہ نیلم منیر کراچی میں 22 مئی 2020 کو حادثے کا شکار ہونے والی پی آئی اے کی پرواز پی کے 8303 میں جاں بحق ہونے والی اپنی بہترین دوست اور معروف ماڈل زارا عابد کو کھو دیا تھا۔

نیلم منیر نے فوٹو اینڈ ویڈیو شیئرنگ ایپ انسٹاگرام پر ایک تصویر پوسٹ کی ہے۔

اداکارہ کی جانب سے پوسٹ کی جا نے والی تصویر میں دیکھا جا سکتا ہے کہ نیلیم منیر کے ہمراہ ماڈل زارا عابد بھی موجود ہیں۔

تصویر میں دیکھا جا سکتا ہے کہ دونوں دوستوں نے سفید لباس زیب تن کیے ہوئے ہیں۔

اداکارہ نے تصویر شیئر کرتے ہوئے زارا عابد کی مغفرت کے لیے دُعا کی۔

نیلم منیر نے پوسٹ کردہ تصویر کے کیپشن میں لکھا کہ  پی آئی اے کے طیارے کے حادثے کو ایک سال گزر گیا ہے اور میری خوبصورت اور پیاری دوست زارا عابد بھی اس حادثے میں انتقال کرگئی تھی۔

نیلم منیر نے اپنی مرحوم دوست کے لیے دُعا کرتے ہوئے لکھا کہ اللّہ تعالیٰ زارا کو جنت الفردوس عطا کرے، آمین۔

یاد رہے کہ زارا عابد پاکستان فیشن انڈسٹری میں تیزی سے اُوپر کی جانب جارہی تھیں۔

اس کے علاوہ گزشتہ سال ماڈل زارا عابد نے ہم اسٹائل ایوارڈز میں بہترین فیمیل ماڈل کا ایوارڈ اپنے نام کیا تھا۔

ماڈل نے انڈسٹری کے معروف ڈیزائنرز ثنا سفیناز کے ساتھ کیرئیر کا آغاز کیا تھا۔

جبکہ بہت جلد وہ عظیم سجاد کی فلم چوہدری سے بڑی اسکرین پر بھی ڈیبیو کرنے والی تھیں۔

واضح رہے کہ گزشتہ سال کراچی میں حادثے کا شکار ہونے والے طیارے میں 99 افراد سوار تھے۔

 محکمہ صحت سندھ کے حکام نے بتایا تھا کہ 2 مسافر محمد زبیر اور ظفر مسعود حادثے میں معجزاتی طور پر بچ گئے جبکہ 97 کے جاں بحق ہونے کی تصدیق کردی گئی تھی۔