شہرت یافتہ امریکی گلوکارہ، اداکارہ، پروڈیوسر، سماجی رہنما اور کاروباری خاتون لیڈی گاگا نے اپنی زندگی کے بارے میں اہم انکشاف کر دیا ہے۔

لیڈی گاگا نے شہزادہ ہیری اور اوپرا ونفرے کی جانب سے ذہنی صحت پر بنائی گئی دستاویزی سیریز ’دی می یو کانٹ سی‘ یعنی ’مجھے تم نہیں دیکھ سکتے‘ میں اپنے ساتھ ہونے والے استحصال پر کھل کر بات کی۔

لیڈی گاگا نے بتایا کہ کم عمری میں طاقتور شخص کی جانب سے متعدد مرتبہ ’ریپ‘ کیے جانے کی وجہ سے وہ حاملہ ہوگئی تھیں۔

لیڈی گاگا نے 2014 میں انکشاف کیا تھا کہ جب انہوں نے گلوکاری کی دنیا میں قدم رکھا اور جب ان کی عمر محض 19 برس تھی، تب انڈسٹری کے ایک شخص نے ان کا ’ریپ‘ کیا تھا جس کے باعث وہ تقریباً اپنا ذہنی توازن کھو بیٹھی تھیں۔

جبکہ گلوکارہ نے 2016 اور 2018 میں بھی مذکورہ معاملے پر بات کی تھی۔

انہوں نے بتایا کہ 19 برس کی عمر میں متعدد مرتبہ ان کا ’ریپ‘ کیا گیا تھا۔

لیڈی گاگا نے سیریز میں مذکورہ شخص کا نام لینے سے گریز کرتے ہوئے کہا کہ اگرچہ ’می ٹو مہم‘ کے بعد بہت ساری خواتین نے بہادری دکھائی مگر وہ اب بھی اس مکروہ شخص کا نام لینے کو تیار نہیں۔

لیڈی گاگا نے کہا کہ وہ اس مکروہ شخص کا دوبارہ کبھی چہرہ دیکھنا پسند نہیں کریں گی اور نہ ہی اس کا نام لینا پسند کریں گی۔

اداکارہ نے بتایا کہ کم از کم تین سال بعد انہوں نے آہستہ آہستہ زندگی کی جانب لوٹنا شروع کیا تاہم اب بھی انہیں وہ واقعات یاد آتے ہیں تو انہیں تکلیف ہوتی ہے۔

واضح رہے کہ لیڈی گاگا کا شمار دنیا کی معروف ترین اور طاقتور ترین شوبز و میوزک شخصیات میں شمار ہوتا ہے، انہوں نے کم عمری میں گلوکاری کا آغاز کیا تھا۔