ہالی ووڈ انڈسٹری کی معروف اداکاہ نے بھارت میں تیزی سے بڑھنے والی کورونا کی صورتحال پر آواز بلند کر لی ہے۔

اداکارہ جینیفر اینسٹن نے کورونا بحران سے نمٹنے کے لیے بھارت کی مدد کرنے کی درخواست کی ہے۔

ہالی ووڈ کی معروف اداکارہ جینیفر اینسٹن نے اپنےتصدیق شدہ انسٹاگرام اکاؤنٹ پر مداحوں کوبھارت کی مدد کرنےکے لیے عطیات کرنے کی درخواست کی ہے۔

جینیفرنے کہا کہ عالمی وبا کورونا کے انفیکشن کی دوسری لہر کی شدت نے بھارت کو اپنی لپیٹ میں لیا ہوا ہے۔

انہوں نے بتایا کہ گذشتہ پانچ دنوں سےملک میں ہر روز نئے کیسزرپورٹ ہونے کے عالمی ریکارڈ قائم ہورہے ہیں۔

اداکارہ نے مزید لکھا کہ امریکئیر بھارت کے لئے فوری امدادکے لیے رقم جمع کررہی ہے۔

اس حوالے سے جینیفرنے لنک اور تفصیلات بھی شیئر کیں تاکہ لوگ اس مقصد کے لئے رقم کا عطیہ کرسکیں۔

یاد رہے کہ امریکئیر ایک عالمی این جی او ہے جو صحت اور ترقی کے کاموں پر مرکوز ہے اور غربت ، آفت یا بحران سے متاثرہ افراد کی مدد کرتی ہے۔

انہوں نے مداحوں کو اس تنظیم کے بارے میں یہ آگاہی بھی دی۔

اداکارہ نے اس تنظیم کے حوالے سے بتایا کہ یہ ہیلتھ ورکرز کے لئے پی پی ای کٹس کی خریداری ، ادویات کی ترسیل اور ٹیلی ڈاک سپورٹ اور غربت میں رہنے والی کمیونٹیز کو کورونا کے پھیلاؤ کو روکنے کے لئے تعلیم دینے میں رقم کا استعمال کرے گی۔

گزشتہ روز ہالی ووڈ اداکارہ ریس ودرسپون اور گلوکارہ کیٹی پیری کی جانب سے بھارت کی مدد کی اپیل سامنے آئی تھی۔

اس حوالے سے اداکارہ کیٹی یپری نے فوٹو ینڈ ویڈیو شیئرنگ ایپ انسٹاگرام پر پوسٹ کی تھی۔

اداکارہ کی جانب سے پوسٹ کی کیپشن میں لکھا گیا تھا کہ آپ لوگوں نے بھارت میں کورونا کی صورتحال کے بارے میں سنا ہوگا جہاں اس بیماری کے کیسز کی تعداد روزانہ ایک نیا ریکارڈ بنارہی ہے۔

کیٹی یپری نے مزید لکھا تھا کہ اسپتالوں نے آکسیجن اور دیگر سہولیات کی کمی کی وجہ سے مریضوں کو ایڈمٹ کرنے سے انکار کردیا ہے جس کی وجہ سے لوگ اپنے پیاروں کو اسپتال کے باہر مرتا دیکھ رہے ہیں۔

قابلِ غور بات یہ ہے کہ اداکارہ نے اپنے اکاؤنٹ پر امداد دینے کے لئے تفصیلات بھی شیئر کی۔

علاوہ  ازیں  آسکر ایوارڈ یافتہ اداکارہ ریس ودرسپون نے بھی بھارت کی امداد کے لئے اپیل کی تھی۔

جبکہ بھارت کی شوبز شخصیات بھی فنڈز اور طبی سہولیات فراہم کر کے کورونا متاثرین کی مدد کر رہی ہیں۔

امریکہ، آسٹریلیا اور تائیوان سمیت کئی ممالک  آکسیجن، ویکسینز سمیت اہم ضروری اشیاء جلد از جلد بھارت پہنچانے کے لئے سرگرم ہیں۔

واضح رہے کہ بھارت میں کورونا کی صورتحال مزید بگڑ گئی ہے اور اموات کے لحاظ سے بھارت دنیا میں چوتھے نمبر پر آگیا ہے۔

گزشتہ دنوں بھارت میں کورونا سے کل اموات کی تعداد دو لاکھ سے زیادہ ہوگئی۔

مسلسل کئی روز سے بھارت میں کورونا کیسز کی تعداد تین لاکھ سے زائد ہوچکی ہے۔

 جبکہ تین ہزار سے زائد اموات ریکارڈ کی گئیں ہیں۔

رپورٹس کے مطابق اسپتالوں میں بستر اور آکسیجن سلینڈر مہیا نہ ہونے کی وجہ سے لوگ اپنے پیاروں کو دم توڑتا دیکھنے پر مجبور ہوگئے ہیں۔

 شمشان گھاٹ میں بھی اپنے پیاروں  کی آخری رسومات  ادا کرنے کے لئے باری کا انتظار کرنے پر مجبور ہیں۔