کالے اور سفید چنے ہر گھر میں ہی کھائے جاتے ہیں اور جب خواتین کے پاس سبزیوں اور دالوں کے آپشنز ختم ہو جاتے ہیں تو ایسے میں خواتین ان کو کبھی  اُبلے ہوئے انڈوں اور کبھی آلو کے ساتھ شامل کر کے سالن بنا لیتی ہیں یا ان کا پلاؤ بنا کر گزارا کر لیتی ہیں۔

سفید چنوں کے فوائد سے متعلق ماہرین کا کہنا ہے کہ سفید چنے پروٹین حاصل کرنے کا ایک بہترین ذریعہ ہے، چنوں کو فائبر، میگنیشیم، پروٹین، آئرن اور زنک جیسی غذائی اجزاء کا پاور ہاؤس بھی کہا جاتا ہے۔

غذائی ماہرین کے مطابق کالے چنوں میں غذائیت زیادہ پائی جاتی ہے اسی لئے انہیں بال ،ناخن، جلد اور جسم کے پٹھوں کی صحت کے لئے بہتر غذا قرار دیا جاتا ہے ،کالے چنے کھانے سے جسم کو فوری طاقت ملتی ہے اس میں مو جود فائبر قبض کو فوری دور کر تا ہے۔

ماہرین کا کہنا ہے کہ وزن گھٹانے کے خواہشمند افراد کالے چنوں کے بجائے سفید چنے ابال کر یا چاٹ بنا کر اپنی ڈائیٹ میں شامل کر سکتے ہیں جبکہ کالے چنوں میں کیلوریز اور شوگر زیادہ پائی جاتی ہیں اسی لئے کالے چنے وزن گھٹانے کے بجائے بڑھانے میں زیادہ بہتر کردار ادا کرتے ہیں۔

اگر آپ اپنا وزن بڑھانا چاہتے ہیں تو کالے چنوں کو بغیر کسی پریشانی کے کھایا جا سکتا ہے۔

کالے چنوں میں  شوگر کی مقدار سفید چنوں سے زیادہ ہوتی ہے مگر پھر بھی عام انسانی جسم کے لئے نہ ہونے کے برابر اور ڈائیٹنگ کرنے والے افراد کے لئے زیادہ سمجھی جاتی ہے۔

ماہرین کا یہ بھی کہنا ہے کہ چنے اینیمیا یعنی خون کی کمی دور کرتے ہیں کیونکہ ان میں بھاری مقدار میں آئرن پایا جاتا ہے۔

اس کے ساتھ ساتھ چنوں میں پایا جانے والا کیلشیم ہڈیوں کی بناوٹ اور مضبو طی میں اہم کر دار ادا کرتا ہے ،چنے کھانے سے بھرپور نیند آتی ہے اور تادیر بھوک کا احساس بھی نہیں ہوتا۔