چین کے رہائشی علاقے میں گیس پائپ لائن میں زوردار دھماکہ ہوا جس کے باعث 12 افراد جاں بحق جبکہ متعدد زخمی ہوگئے ہیں۔

تفصیلات کے مطابق چین کے شہر شیان میں گیس پائپ لائن میں دھماکہ اس وقت پیش آیا جب لوگ خریداری کیلئے عمارت کے نیچے موجود فوڈ مارکیٹ میں موجود تھے۔

دھماکے کی شدت سے فوڈ مارکیٹ کی عمارت تباہ ہوگئی جبکہ متعدد مکانات تباہ اور گاڑیوں کو بھی نقصان پہنچا۔

دھماکے میں دکاندار اور فوڈ مارکیٹ میں تازہ سبزیاں خریدنے والے افراد سب سے زیادہ متاثر ہوئے۔

سرکاری حکام کا کہنا ہے کہ دھماکے میں ڈیڑھ سو سے زائد زخمی ہوئے ہیں، زخمیوں میں انتالیس افراد کی حالت تشویشناک ہے۔

سرکاری حکام کا مزید کہنا ہے کہ واقعے کے بعد علاقے میں امدادی سرگرمیوں کا آغاز کردیا گیا ہے تاہم دھماکے کی وجوہات معلوم نہیں ہوسکی ہیں۔ دھماکے کی وجہ جاننے کے لیے تحقیقات شروع کردی گئی ہیں۔