شہر قائد میں ہونے والی بجلی کی غیر اعلانیہ لوڈ شیڈنگ نے اس سخت گرمی کے موسم میں عوام کی زندگیوں کو اجیرن بنا دیا ہے۔

شہر میں رات گئے تک مختلف رہائشی علاقوں میں بجلی کی فراہمی معطل رہنے لگی ہے جس کے باعث خواتین ، بچے اور بوڑھے مزید پریشان ہیں۔

تفصیلات کے مطابق نارتھ کراچی ، نیوکراچی ، پی آئی بی کالونی ، صدر، ملیر، شاہ فیصل ، لیاقت آباد ، تین ہٹی ، بلدیہ ، سائٹ ، شاہ لطیف ٹاؤن ، کھوکراپار، گلستان جوہر اور لیاری سمیت شہر کے مختلف علاقوں میں بجلی کی غیر اعلانیہ لوڈشیڈنگ جاری ہے۔

کے الیکٹرک کے ترجمان کا کہنا ہے کہ شہر میں کہیں بھی لوڈشیڈنگ نہیں کی جارہی ہے تاہم کچھ علاقوں میں کیبل فالٹس کے باعث بجلی کی فراہمی معطل کی گئی تھی۔

واضح رہے کہ میڈیا کی جانب سے ترجمان کے الیکٹرک سے سوال کئے گئے  کہ تکنیکی فالٹس کی تعداد کیا ہے  اور یہ کس نوعیت کےہیں ؟ اور گزشتہ ایک ہفتےسے رات گئے فالٹس کیوں رپورٹ ہو رہےہیں؟ جن پر تاحال کوئی جواب نہ مل سکا۔