وفاقی وزیر منصوبہ بندی اسد عمر کا کہنا ہے کہ گرین لائن منصوبہ ستمبر تک مکمل ہونے جارہا ہے۔

تفصیلات کے مطابق وفاقی وزیر منصوبہ بندی اسد عمر نے کہا کہ وزیراعلیٰ سندھ پوائنٹ اسکورنگ کرنا چاہتے ہیں۔ وفاق نے سندھ میں موٹرویز کیلئے 300 ارب روپے جاری کیے لیکن سندھ حکومت نےموٹرویز کیلئے ایک روپیہ خرچ نہیں کیا۔

انہوں نے کہا کہ وزیراعظم عمران خان تعصب کی سیاست نہیں کرتے۔ ملتان، سکھر، موٹروے پرکام پچھلی حکومت نے شروع کیا اور مکمل ہم نے کیا، سندھ کے ساتھ کوئی امتیازی سلوک نہیں کیا جارہا ہے۔

اسدعمر نے یہ بھی کہا کہ وزیراعظم نے سندھ کیلئے ایک سال میں 2 ترقیاتی پیکج کا اعلان کیا، سندھ کے ترقیاتی منصوبوں کے لیے وفاق نے ریکارڈ فنڈز فراہم کیے۔

انہوں نے مزید یہ بھی کہا کہ وزیراعلیٰ آپ سندھ کی حکومت کے ضرور ہیں لیکن سندھ کےعوام کے نہیں، سندھ میں پہلےجو پیسہ گیا اس سے سارے محل بنے، وفاقی حکومت سندھ کی عوام کیلئے پیسے خرچ کرے گی۔

ذرائع کے مطابق اسدعمر نے یہ بھی کہا کہ پی ڈی ایم کی تباہی کے بعد انکے خواب چکنا چور ہوگئے ہیں یہ پچھلے 2 ہفتے سے تعصب کی سیاست کررہے ہیں۔

وفاقی وزیر منصوبہ بندی اسد عمر نے مزید کہا کہ سندھ کارڈ کے استعمال سےعوام تنگ آچکے ہیں، کبھی کہتے ہیں پنجاب نے پانی روک لیا کبھی کچھ کہتے ہیں۔