وزیراعلیٰ سندھ سید مراد علی شاہ نے کہا ہے کہ یہ بزرگ شخص ایک حلال رزق اور محنت کی بہترین مثال ہے۔

ترجمان وزیراعلیٰ سندھ کے مطابق وزیر اعلیٰ سندھ سید مراد علی شاہ نے کراچی شہر کا اچانک دورہ کیا اور رحمانی مسجد طارق روڈ کے پاس ایک کولڈ ڈرنک کارنر پر رُک گئے۔

کولڈ ڈرنک کارنر پر پٹھان نابینا شخص مشروبات بیچ رہا تھا اور اس نابینا بزرگ نے اپنے اسٹور پر ایک بورڈ لگایا ہوا ہے، جس پر وزیراعلیٰ سندھ سے اپیل کی گئی ہے کہ وہ نابینا بوڑھا ہے اس کو کوئی تنگ نہ کرے۔

اس موقع پر وزیراعلیٰ سندھ سید مراد علی شاہ نے بزرگ شخص سے کہا میں وزیراعلیٰ سندھ ہوں، آپ کو کون تنگ کرتا ہے؟ جس پر بزرگ نے وزیراعلیٰ سندھ کو بتایا کہ پولیس اور انتظامیہ تنگ کرتی ہے۔

سید مراد علی شاہ نے اے ڈی سی ون ایسٹ، ایس ایس پی ایسٹ اور ایڈمنسٹریٹر کے ایم سی کو اسی وقت فون کرکے بزرگ کو تنگ نہ کرنے کی ہدایت کی اور یہ بھی کہاکہ جب بھی اس بزرگ کے اسٹور پر آئیں ان سے خریداری کریں۔

وزیراعلیٰ سندھ سید مراد علی شاہ نے کہا کہ یہ بزرگ نابینا ہونے کے باوجود اپنے بچوں کیلئے حلال رزق کمارہا ہے اور یہ حلال رزق اور محنت کی بہترین مثال ہے۔ انھوں نے کہا کہ ہمیں اس کی ہمت افزائی کرنا چاہیے۔