وفاقی وزیر خارجہ شاہ محمود قریشی نے کہا ہے کہ فلسطین میں مظالم رکوانے میں پاکستان کا کلیدی کردار رہا ہے۔

تفصیلات کے مطابق وفاقی وزیر خارجہ شاہ محمود قریشی نے میڈیا سے گفتگو کرتے ہوئے کہا کہ سوشل میڈیا پر یہودی لابی نے میری ذات پر حملہ کیا تو پاکستانیوں نے میرا دفاع کیا۔

انہوں نے کہا کہ وزیراعظم عمران خان نے فلسطین سے متعلق واضح مؤقف اپنایا، پاکستان نے او آئی سی سمیت مغربی ممالک کے ضمیر کو جھنجوڑا، اسرائیلی فورسز نے غزہ میں خون کی ہولی کھیلی، مسجداقصیٰ میں نمازیوں پرحملہ کیا گیا، نہتے فلسطینیوں پر بمباری کی گئی، فلسطین میں مظالم کی انتہا کی گئی،عالمی میڈیا پر بلیک آؤٹ رہا، فلسطین کے لئے دنیا بھر میں مظاہرے کیے گئے۔

شاہ محمود نے یہ بھی کہا کہ فلسطین پر سلامتی کونسل کی 4 نشستیں بے نتیجہ رہی ہیں۔

وفاقی وزیر خارجہ کا کہنا تھا کہ او آئی سی کے پلیٹ فارم سے ہم نے فلسطین کا مقدمہ پیش کیا جبکہ یواین اجلاس جاری تھا اطلاع ملی اسرائیل جنگ بندی کے لئے تیار ہیں۔

وفاقی وزیر خارجہ شاہ محمود قریشی نے مزید کہا کہ جنیوا میں مخالفت کے باوجود قرارداد اکثریت میں منظور ہوئی، اسرائیل کےجنگی جرائم کی تحقیقات ہوگی اور رپورٹ پیش کی جائے گی۔