آرمی چیف جنرل قمر جاوید باجوہ سے پاکستان میں تعینات چینی سفیر نونگ رونگ نے ملاقات کی ہے۔

پاک فوج کے شعبہ تعلقات عامہ (آئی ایس پی آر) کے مطابق ملاقات میں باہمی دلچسپی کے امور اور سی پیک کی پیش رفت پر بات چیت کی گئی  ہے۔

آئی ایس پی آر کے مطابق  ملاقات میں خطے کی سیکیورٹی صورتحال سمیت افغان امن عمل کی پیش رفت سے متعلق امور پر بھی بات کی گئی۔

چینی سفیر نے خطے میں امن و استحکام سمیت افغان امن عمل میں پاکستان کی مخلصانہ کوششوں کو سراہا۔

آرمی چیف نے کورونا کے خلاف جنگ میں چین کے کردار اور ویکسین کی فراہمی پر چین کا شکریہ ادا کیا۔

آرمی چیف کا کہنا تھا کہ پاکستان اپنے آئرن برادر کے ساتھ دوستانہ تعلقات کی نہایت قدر کرتا ہے۔

اس کے علاوہ آرمی چیف نے چینی سفیر کو پاک چین سفارتی تعلقات کے ستر سال مکمل ہونے پر بیجنگ میں گرینڈ تقریب کے انعقاد پر مبارکباد بھی پیش کی۔