سندھ اسمبلی کا اجلاس ایک بار پھر ہنگامہ آرائی کی نظر ہوگیا، تحریک انصاف کے ارکان رابستان خان چار پائی لے کر ایوان میں آگئے۔

تفصیلات کے مطابق اسپیکر آغا سراج درانی کی زیر صدارت سندھ اسمبلی کا اجلاس شروع ہوا۔

اجلاس میں قائد حزب اختلاف حلیم عادل شیخ نے نکتہ اعتراض پر بات کرنے کی اجازت مانگی لیکن انھیں اجازت نہ ملی جس پر پی ٹی آئی ارکان نے بھرپور احتجاج شروع کر دیا۔

احتجاج کے دوران اسپیکر نے حالات پر قابو پانے کی کوشش کی لیکن ان کی ایک نہ چلی۔

اسمبلی میں اس وقت شدید بدنظمی پیدا ہوئی جب اپوزیشن ارکان بطور احتجاج چارپائی اور بستر ایوان میں لے آئے، اسپیکر سندھ اسمبلی ارکان کو تحمل مزاجی سے کام لینے کی ہدایت کرتے رہے مگر حکومت و اپوزیشن ارکان نے ان کی ایک نہ سنی۔

بعد میں اپوزیشن لیڈر حلیم عادل شیخ نے ایک قرارداد پیش کی کہ اپوزیشن ارکان کو ایوان میں بولنے کے حق سے محروم رکھا جارہا ہے۔

اسپیکر آغا سراج درانی نے برہمی کا اظہار کرتے ہوئے کہا کہ اسمبلی کی بے حرمتی کرنے والوں کے خلاف ایکشن ہوگا۔