فواد چوہدری کا کہنا ہے کہ دنیا بشمول امریکہ پاکستان کو نظر انداز نہیں کر سکے گی۔

تفصیلات کے مطابق وفاقی وزیر اطلاعات و نشریات چوہدری فواد حسین نے  وزیراعظم عمران خان کے نیویارک ٹائمز کو دیئے گئے انٹرویو کے حوالے سے گفتگوکرتے ہوئے کہا ہے کہ وزیراعظم عمران خان نے نیویارک ٹائم کو اپنے انٹرویو میں امریکہ، چین اور افغانستان کے معاملات پر اپنا نکتہ نظر واضح طور پر دنیا کے سامنے رکھا ہے، وزیراعظم عمران خان نے اپنے انٹرویو میں امریکہ کے ساتھ تعلقات کی ایک نئی جہت بیان کی ہے۔

وفاقی وزیر اطلاعات کا کہنا ہے کہ وزیراعظم نے امریکہ کے ساتھ سیکورٹی تعلقات کی بجائے اقتصادی تعلقات پر زور دیا ہے جبکہ ماضی میں امریکہ کے ساتھ تعلقات کو سیکورٹی کے تناظر سے دیکھا جاتا تھا۔

انھوں نے کہا ہے کہ وزیراعظم نے اپنے انٹرویو میں بھارت کے ساتھ تعلقات میں بہتری کی بھی امید ظاہر کی ہے اگر مستقبل میں بھارت کے ساتھ ہمارے تعلقات ٹھیک ہوتے ہیں تو بھارت اور چین دو بڑی منڈیوں کے درمیان پاکستان کو جغرافیائی لحاظ سے ایک اہم مقام حاصل ہوگا۔

ان کا کہنا ہے کہ وزیراعظم نے افغانستان کے حوالے سے بھی موقف واضح کیا کہ ہم اپنی سرزمین نہ تو امریکہ اور نہ ہی افغانستان کے متحارب دھڑوں کو استعمال کرنے دیں گے بلکہ وزیراعظم کا موقف ہے کہ اگر افغانستان میں صورتحال خراب ہوتی ہے تو پھر ہم افغانستان کے ساتھ اپنی سرحد مکمل طور پر سیل کرنے کا سوچ سکتے ہیں۔

وفاقی وزیر اطلاعات نے کہا ہے کہ پاک افغان بارڈر کے 90 فیصد علاقے پر ہم باڑ لگا چکے ہیں، ہم افغانستان کے ساتھ سرحد مکمل طور پر سیل کرنے کی پوزیشن میں ہیں، افغانستان کا حل اس انداز سے نکلنا چاہئے کہ تمام متحارب دھڑے شامل ہوں اور افغانستان میں ایک مستحکم حکومت عمل میں آئے ہیں۔

ان کا کہنا ہے کہ افغانستان کے اندر امن پاکستان کے لئے بہت اہم ہے، وزیراعظم نے افغانستان کے استحکام کے لئے پاکستان کی پوزیشن واضح کی ہے، ہم ان کی مدد کرنا چاہتے ہیں۔

فواد چوہدری نے کہا ہے کہ چین اور امریکہ کے درمیان تناﺅ کو کم کرنے کے لئے ہم اپنا کردار ادا کرنے کو تیار ہیں، 1970 کی دہائی  میں بھی پاکستان نے اس وقت اپنا کردار ادا کیا تھا جب امریکہ اور چین کے درمیان تناﺅ عروج پر تھا۔

ان کا مزید کہنا ہے کہ وزیراعظم نے اپنے انٹرویو میں کہا کہ امریکہ اور چین دونوں اقتصادی طاقتیں ہیں، ان کے درمیان تعلقات بہتر ہوں گے تو اس سے پوری دنیا میں بہتری آئے گی۔