وزیراعلیٰ پنجاب سردار عثمان بزدار نے کہا ہے کہ پنجاب میں ہر کام میرٹ اور انصاف پر کیا جاتا ہے۔

تفصیلات کے مطابق وزیراعلیٰ پنجاب سردار عثمان بزدار سے انصاف لائرز فورم کے وفد نے ملاقات کی۔

ملاقات میں وزیراعلیٰ پنجاب نے کہا کہ پنجاب حکومت نے بار ایسوسی ایشنز کے لیے 25 کروڑ روپے کی رقم مختص کی ہے۔

عثمان بزدار نے کہا کہ ہماری حکومت نے وکلاء برادری کے مسائل کے حل کے لئے عملی اقدامات کئے ہیں جبکہ ماضی کی حکومتوں نے وکلاء برادری کے مسائل کو یکسر فراموش کئے رکھا۔

وزیراعلیٰ پنجاب نےیہ بھی کہا کہ ماضی میں مخالفین کو سیاسی انتقام کا نشانہ بنایا گیا جبکہ ہماری حکومت نے سیاسی انتقام کے اندھے کلچر کا خاتمہ کیا ہے۔

سردار عثمان بزدار کا کہنا تھا کہ ہم نے پولیس اور انتظامیہ کو سیاسی دباؤ سے آزاد کیا ہے، جلد لاہور میں انصاف لا ئرز فورم کا گرینڈ کنونشن بلایا جائے گا۔

وزیراعلیٰ پنجاب سردار عثمان بزدار کا مزید کہنا تھا کہ وکلاء برادری کو ہیلتھ کارڈز بھی دئیے جائیں گے اور وکلاء برادری کی رہائش کا مسئلہ حل کرنے کے حوالے سے جلد خوشخبری دیں گے۔