مریم اورنگزیب کا کہنا ہے  کہ کل پارلیمان میں جو ہوا بہت افسوسناک  ہے۔

تفصیلات کے مطابق  مسلم لیگ ن کی  ترجمان مریم  اورنگزیب  نے اپنے جاری کردہ بیان میں کہا کہ کل حکومت نے قائدِ حزبِ اختلاف اور اپوزیشن  پر حملہ نہیں کیا بلکہ پارلیمنٹ پہ حملہ کیا ہے۔

ان کا کہنا ہے کہ عمران صاحب نے اپنے دستخطوں سے آٹا، چینی ، براڈ شیٹ اور رنگ روڈ میں ڈاکہ ڈالا اور پھر شور مچا کر کمیشن اور انکوائیری کا حکم دیا، وزراء شروع ہی سے اجلاس میں گالی دینے، حملہ کرنے اور شہباز شریف کی تقریر روکنے کے لئے آئے تھے۔

مریم اورنگزیب  نے کہا ہے کہ عمران خان صاحب نے کابینہ کے اجلاس میں عوام دشمن بجٹ میں مہنگائی اور ٹیکس ختم کرنے کا حکم نہیں بلکہ شہباز شریف اور اپوزیشن پہ حملے کا حکم دیا ہے۔

انھوں نے کہا ہے کہ وزراء اور کرائے کے ترجمان پارلیمان میں اجلاس میں قائدِ حزبِ اختلاف شہباز شریف اور اپوزیشن پہ حملہ کرنے آئے تھے، عمران صاحب نے کرائے کے ترجمانوں کا اجلاس بلا کر شہباز شریف اور اپوزیشن کو گالی دینے کا حکم دیا۔

مسلم لیگ ن کی ترجمان نے کہا ہے کہ عمران صاحب نے شہباز شریف کی تقرری عوام تک نہ پہنچنے کا حکم دیا، حکومتی ارکان نے بے بس ہو کر گالی دی کیونکہ شہباز شریف صاحب کی تقریر نہ رُک سکی۔

ان کا مزید کہنا ہے کہ جب عمران صاحب کے حکم کی تعمیل نہیں ہو رہی تھی اور شہباز شریف صاحب کی تقریر جاری رہی تو تقریر روکنے کے کئے شہباز شریف صاحب پہ بجٹ کی کتاب پھینکی گئی۔