پاکستان پیپلز پارٹی کی مرکزی سیکریٹری اطلاعات شازیہ مری نے  کہا ہے کہ کراچی سمیت دیگر شہروں میں گیس کی قلت ہے اور گھریلو صارفین بھی پریشان ہے۔

تفصیلات کے مطابق پاکستان پیپلز پارٹی کی مرکزی سیکریٹری اطلاعات شازیہ مری نے  گیس بحران پر اپنے ایک بیان میں کہا کہ سندھ کے اندر گیس کا بحران شدت اختیار کر چکا ہے جو نہایت ہی افسوس ناک عمل ہے

شازیہ مری نے کہا کہ سندھ وہ صوبہ ہے جو پاکستان میں 60 سے 70 فیصد گیس پیدا کرتا ہے، آئین پاکستان کے آرٹیکل 158 کے مطابق جس صوبے سے گیس کی پیداوار ہوگی پہلے اس کی ضرورت کو پورا کیا جائے گا۔

پاکستان پیپلز پارٹی کی مرکزی سیکریٹری اطلاعات نے یہ بھی کہا کہ صوبہ سندھ کو اپنے ضرورت کے مطابق گیس فراہم نہیں کی جارہی ہے، ایک عرصے سے صوبہ سندھ  کے ساتھہ گیس بحران کی زیادتی کی جارہی ہے اور اب تو حد یہ ہے کہ سوئی سدرن گیس نے  صوبہ سندھ کے صنعتوں کو گیس فراہمی بھی بند کرنے کا فیصلہ کیا ہے۔

شازیہ مری کا کہنا تھا کہ وفاقی حکومت یہ نہ سمجھے کہ سندھ کے ساتھ زیادتی کرنے سے فیڈریشن مضبوط ہوگی اس سے وفاق کمزور ہوگا، وفاقی حکومت کی یہ جو حرکت ہے وہ قابل افسوس اور قابل مذمت ہے۔

پاکستان پیپلز پارٹی کی مرکزی سیکریٹری اطلاعات شازیہ مری کا مزید کہنا تھا کہ کراچی سمیت دیگر شہروں میں گیس کی قلت ہے اور گھریلو صارفین بھی پریشان ہے، لہذا ہم مطالبہ کرتے ہیں کہ آئین پاکستان کے آرٹیکل 158 کے مطابق صوبہ سندھ کو گیس فراہم کی جائی۔