سی پیک کے چیئرمین لیفٹیننٹ جنرل (ر) عاصم سلیم باجوہ نے کہا ہے کہ سی پیک پراجیکٹس تیزی سے تکمیل کی طرف گامزن ہیں۔

تفصیلات کے مطابق وزیراعلیٰ پنجاب سردار عثمان بزدار سے چائنہ پاکستان اکنامک کوریڈور اتھارٹی کے چیئرمین عاصم سلیم باجوہ کی ملاقات ہوئی۔

ملاقات میں پنجاب میں سی پیک کے تحت جاری منصوبوں اور کارپوریٹ زرعی فارمنگ پر ہونے والی پیش رفت پر بات چیت کی گئی۔

اس موقع پر وزیراعلیٰ پنجاب سردار عثمان بزدار نے کہا کہ سی پیک منصوبوں پر ترجیحی بنیادوں پر کام جاری ہے-

وزیراعلیٰ پنجاب نے کہا کہ پنجاب میں سی پیک پراجیکٹس کو شفافیت اور تیز رفتاری کے ساتھ مکمل کیا جا رہا ہے۔

سردار عثمان بزدار نے یہ بھی کہا کہ پنجاب میں سپیشل اکنامک زونز بنائے جا رہے ہیں اور ان زونز میں چینی سرمایہ کاروں کو سہولتیں فراہم کر رہے ہیں۔

وزیراعلیٰ پنجاب سردار عثمان بزدار نے مزید کہا کہ سی پیک پراجیکٹس سے معیشت بہتر ہو گی۔

ملاقات میں پاکستان اکنامک کوریڈور اتھارٹی کے چیئرمین نے کہا کہ سی پیک کے منصوبے پاکستان کی معیشت کیلئے کلیدی اہمیت رکھتے ہیں۔

عاصم سلیم باجوہ نے یہ بھی کہا کہ سی پیک کے تحت کارپوریٹ زرعی فارمنگ کو فرو غ دینے کی ضرورت ہے۔

پاکستان اکنامک کوریڈور اتھارٹی کے چیئرمین عاصم سلیم باجوہ نے مزید کہا کہ پنجاب میں زرعی شعبے میں بے پناہ پوٹنشل ہے، پنجاب میں سی پیک پراجیکٹس کی صورتحال پر پیشرفت اطمینان بخش ہے۔