وفاقی دارالحکومت اسلام آباد کی مویشی منڈیوں میں مہنگائی کی اصل وجہ سامنے آگئی ہے۔

تفصیلات کے مطابق اسلام آباد کی منڈیوں میں بیوپاریوں کو ٹھیکیدار کا عملہ اور پولیس والے دونوں مل کر لوٹ رہے ہیں۔

بیوپاری کا کہنا ہے کہ منڈی میں آنے والے بیوپاریوں سے وفاقی پولیس کے ملازمین 1 ہزار روپے فی جانور بھتہ لے رہے ہیں ،  ٹھیکیدار کا عملہ 2500 روپے فی جانور لے رہا ہے جبکہ سرکاری فیس صرف 5  سو روپے ہے ، 2500 روپے فی جانور لینے کے بعد قناعتوں کے پیسے الگ سے لیے جارہے ہیں۔

بیوپاری کا مزید شکوہ یہ ہے کہ اتنے پیسے لینے کے بعد بھی کوئی سہولت ٹھیکیدار یا انتظامیہ کی جانب سے نہیں دی جارہی ہے، نا انسانوں کے پینے کیلئے پانی ہے نا جانوروں کیلئے جبکہ کوڑے کے ڈھیر پر بٹھانے کے باعث جانور بیمار ہورہے ہیں۔

واضح رہے کہ سی ڈی اے اور ضلعی انتظامیہ کا عملہ اپنا حصہ وصول کرنے کے باعث خاموش تماشائی بنا ہوا ہے۔