خرم شیر زمان کا کہنا ہے کہ کراچی کے پیسے سے آصف زرداری کی نسلوں کا مستقبل سنوارا جارہا ہے۔

تفصیلات کے مطابق پی ٹی آئی کے رہنما خرم شیر زمان نے اپنے بیان میں کہا  ہے کہ روزبروز نیب آصف زرداری کی کسی نئی جائیداد کا پنڈورا بکس کھول دیتا ہے، زرداری خاندان کی سانسیں کرپشن، منی لانڈرنگ ،کمیشن قبضے سے جڑی ہیں۔

خرم شیر زمان نے کہا ہے کہ حقوق کراچی کیلئے اٹھارویں ترمیم پر نظر ثانی وقت کی ضرورت ہے، بدترین انفراسٹرکچر، کھنڈر نما سڑکیں پی پی کی شہر سے نفرت کی گواہی دیتی ہیں، کراچی میں موجود سرکاری اداروں میں مقامی شہریوں کیلئے نوکریاں نہیں ہیں، کراچی کے شہریوں کو روزگار کیلئے بیرون ملک اپنوں سے دور جانا پڑھتا ہے۔

انھوں نے کہا ہے کہ سمندر کے کنارے آباد شہر قائد میں صاف پانی کا کوئی نظام نہیں ہے، پیپلز پارٹی صوبہ سندھ میں قہر کی طرح نازل ہوئی ہے، پی پی کا گھمنڈ دھاندلی کی بنیاد پر حاصل کی گئی اکثریت ہے۔

پی ٹی آئی رہنما نے مزید کہا ہے کہ سندھ کے عوام باشعور ہیں صوبے میں آئیندہ حکومت تحریک انصاف کی ہوگی۔