وزیراعلیٰ بلوچستان جام کمال خان نے کہا ہے کہ صحت کے شعبے میں انقلابی تبدیلیاں لائی جا رہی ہیں۔

تفصیلات کے مطابق وزیراعلیٰ بلوچستان جام کمال خان کی زیر صدارت محکمہ صحت کے وفاقی اور صوبائی بجٹ میں شامل ترقیاتی منصوبوں  پر عملدرآمد کے حوالے سے اجلاس ہوا جس میں کووڈ- 19 رسپانس پروگرام، کم ترقی یافتہ علاقوں میں موجود ڈی ایچ کیوز، ٹی ایچ کیوز اور  بی ایچ یوز کو مستحکم کرنے سمیت پی ایس ڈی پی 22-2021 میں شامل ترقیاتی منصوبوں پر تفصیلی بریفنگ دی گئی۔

[amazonad category=”Auto”]

بریفنگ کے دوران کہا گیا کہ کووڈ 19 رسپانس پروگرام کے تحت 31 ڈی ایچ کیوز اور 7 ٹی ایچ کیو لیول ہسپتالوں کو اپ گریڈ کیا جائے گا ،31 اسٹیٹ آف دی آرٹ آئی سی یو قائم کیے جائیں گے۔

بریفنگ کے دوران یہ بھی کہا گیا کہ پروگرام کے تحت  تمام اضلاع میں 10 بستروں پر مشتمل آئی سی یو اور ایچ ڈی یوز قائم کیے جائیں گے، اس منصوبے کے تحت بلڈ بینک، پیتھالوجی ڈیپارٹمنٹ، ریڈیالوجی ڈیپارٹمنٹ اور تمام سہولیات سے آراستہ ایمبولینسز فراہم کی جائیں گی۔

بریفنگ دیتے ہوئے کہا گیا کہ وفاقی حکومت نے پروگرام پر عملدرآمد کے لیے فنڈز کا اجراء کر دیا ہے، پروگرام کی تکمیل سے مجموعی طور پر ہیلتھ ڈیلیوری سسٹم میں بہتری آئے گی۔

بریفنگ کے دوران کہا گیا کہ صوبے کے تمام بڑے ہسپتالوں کی بہتری کے لیے فنڈز رکھے گئے ہیں جبکہ کم ترقی یافتہ علاقوں کے موجودہ بنیادی مراکز صحت کو مستحکم کرنے کے لئے خطیر فنڈز مختص کیے گئے ہیں۔

بریفنگ دیتے ہوئے یہ بھی کہا گیا کہ سول ہسپتال کوئٹہ میں سرجیکل اور میڈیکل ٹاور کی فزیبلٹی سٹڈی اور اس پر عمل درآمد کے لئے 1000 ملین روپے رکھے گئے ہیں جبکہ موجودہ دیہی مراکز صحت میں ایمرجنسی رسپانس سینٹر قائم کیے جائیں گے۔

بریفنگ دیتے ہوئے مزید کہا گیا کہ چلڈرن ہسپتال کی توسیع، نصیر آباد میں میڈیکل کالج کے قیام کی فزیبلٹی سٹڈی اور نرسنگ کالجز کی تعمیر کے منصوبے بھی شامل کیے گئے ہیں ، شیخ خلیفہ بن زید ہسپتال میں پی جی ایم آئی بلاک تعمیر کیا جائے گا۔

اجلاس کی صدارت کرتے ہوئے وزیراعلیٰ بلوچستان جام کمال خان نے کہا کہ صحت کے شعبے میں انقلابی تبدیلیاں لائی جا رہی ہیں۔

وزیراعلیٰ بلوچستان جام کمال خان نے ہدایت دی کہ کووڈ 19 کنٹرول رسپانس پروگرام پر عمل درآمد کے لئے جامع حکمت عملی اپنائی جائے جبکہ کم ترقی یافتہ علاقوں میں صحت کی سہولیات کی فراہمی اور اسٹرکچر کی مضبوطی کے لیے موثر اقدامات کیے جائیں۔

اجلاس میں سیکریٹری سپیشلائزڈ ہیلتھ کیئر اینڈ میڈیکل ایجوکیشن نورالحق بلوچ، سیکرٹری پرائمری اینڈ سیکنڈری ہیلتھ عزیز احمد جمالی، سیکرٹری بلڈنگ غلام علی بلوچ، وزیراعلیٰ کے پرنسپل سیکریٹری زاہد سلیم، سیکریٹری اطلاعات سہیل الرحمان بلوچ اور اسپیشل سیکرٹری خزانہ لعل جان جعفر سمیت دیگر متعلقہ حکام نے شرکت کی۔