شہباز گِل کا کہنا ہے کہ ملک کو ذاتی جاگیر سمجھ کر لوٹنے والے احتساب سے بھاگ رہے ہیں۔

تفصیلات کے مطابق، معاون خصوصی برائے سیاسی ابلاغ ڈاکٹر شہباز گِل نے شہباز شریف کے بیان پر ردعمل دیتے ہوئے کہا ہے کہ ایک کرپٹ خاندان ملک پر مسلط رہا وہی ملک کی تباہی کا ذمہ دار ہے، پیٹ پھاڑ کر سڑکوں پر گھسیٹنے والے اقتدار کیلئے پاؤں پڑنے تک آگئے ہیں، مفاہمت کے نام پر چھوٹے میاں نااہل خاندان کیلئے این آر او کی تگ و دو میں ہیں۔

 انھوں نے کہا ہے کہ ملازمین کے نام پر اربوں کی منی لانڈرنگ کرنے والوں کو جواب دینا ہوگا، آپ نے جن غریبوں کو لوٹا انہی غریب عوام کے نام پر سیاست نہیں کرنے دینگے۔

معاون خصوصی برائے سیاسی ابلاغ نے مزید کہا ہے کہ ادارہ شماریات کے مطابق گزشتہ ہفتے 9 ضروری اشیا کی قیمتوں میں کمی ریکارڈ ہوئی ہے،19 اشیا کی قیمتوں میں استحکام رہا ہے، بین الاقوامی مارکیٹ میں تیل کی قیمتوں میں اضافے کے باوجود صارفین کو زیادہ سے زیادہ ریلیف فراہم کیا گیا ہے، اس وقت پٹرولیم لیوی پچھلے 6 سال کی کم ترین سطح پر ہے اورپاکستان میں پٹرول کی قیمت سری لنکا، نیپال، بنگلہ دیش، چین اور بھارت کے مقابلے میں کم ہے۔