جنوبی افریقا میں گھومنے کی غرض سے ایک کیمپ میں قیام کرنے والے شخص کو صبح سویرے کچن کی کھڑکی کھولتے ہی دھاڑتے شیر سے سامنا ہوگیا جس کی ویڈیو وائرل ہوگئی ہے۔

اکثر اوقات انسان کے ساتھ انہونی ہوتی رہتی ہے مگر جب کسی خون خوار جنگلی جانور کے ہاتھوں جان کے لالے پڑ جائیں تو اچھے اچھوں کے ہاتھ پاؤں پھول جاتے ہیں، مگر کبھی کبھار کچھ لوگ ایسی صورتحال سے بھی  خوب لطف اندوز ہوتے ہیں۔

ایسا ہی ایک واقعہ جنوبی افریقا کے ایک سیرو تفریح کے لئے لگائے جنگل کے کیمپ میں پیش آیا جہاں گھومنے کی غرض سے وہاں موجود ڈیلان پانوس نامی شخص نے صبح کی کافی بناتے ہوئے قدرتی نظاروں سے محظوظ ہونے کے لئے کھڑکی کھولی تو ایک دھاڑتے شیر کا اُس سے سامنا ہوا۔

 اس ویڈیو میں دیکھا جا سکتا ہے کہ ڈیلان پانوس کافی بنانے کے لئے جب بھی کھڑکی کے پاس سے گزرتا ہے شیر اُس پر دھاڑتا ہے۔

اس دوران ڈیلان پانوس اس منظر سے خوف زدہ ہونے کے بجائے خوب انجوائے کر رہا ہے اور ویڈیو میں بتا رہا ہے کہ اُس کے ساتھ اس کیمپ میں اور لوگ بھی موجود ہیں اور یہاں کھڑکی سے باہر ایک شیر اور شیرنی ہم سے ملنے آئے ہوئے ہیں۔