چنگچی رکشے میں بیٹھی لڑکی کے ساتھ نازیبا حرکت کر کے فرار ہونے والے اوباش نوجوان کی شناخت کرلی گئی ہے۔

تفصیلات کے مطابق ترجمان پنجاب حکومت فیاض الحسن چوہان کا کہنا ہے کہ جلد اسے گرفتار کرلیا جائے گا۔

فیاض الحسن نے کہا کہ ملزم ٹریس ہو گیا ہے، گرفتارکر کے سخت سزا دی جائے گی۔

انہوں نے مزید کہا کہ پنجاب پولیس نے تمام دستیاب وسائل اور ٹیکنالوجی کو بروئے کار لاتے ہوئے اس نوجوان کو ٹریس کرلیا ہے، ٹریس کرنا اہم کام تھا کیوںکہ ویڈیو میں اس کا چہرہ نہیں تھا ،ٹریس ہوگیا ہے تو گرفتاری بھی عمل میں آجائے گی۔

خیال رہے کہ گذشتہ روز سوشل میڈیا پر وائرل ہونے والی ایک ویڈیو میں دیکھا جاسکتا ہے کہ ایک شاہراہ پر نوجوان ہلڑ بازی کر رہے ہیں اور اسی دوران چنگچی رکشے میں جانے والی ایک لڑکی کو نوجوان رکشے میں چڑھ کر زبردستی بوسہ دیکر فرار ہوتا ہے اور لڑکی ہکا بکا رہ جاتی ہے۔

خیال رہے کہ لاہور میں 14 اگست کو گریٹر اقبال پارک میں بھی منچلوں نے ایک خاتون سے بدتمیزی کی ،کپڑے پھاڑ ڈالے اور اسے ہوا میں اچھالتے رہے، اس واقعے میں بھی اب تک 66 افراد کو گرفتار کیا جاچکا ہے۔