وزیر اعظم کے معاون  خصوصی برائے سیاسی ابلاغ  ڈاکٹر شہباز گل نے کہا ہے کہ ملک غریب سے غریب تر اور آلِ شریف امیر تر ہوتے گئے ہیں۔

تفصیلات کے مطابق ڈاکٹر شہباز گِل نے مریم اورنگزیب کے بیان پر ردِ عمل دیتے ہوئے کہا کہ آلِ شریف کے کرپشن کے حصہ دار درباریوں کے برے دن چل رہے ہیں اور کرپشن سے دوری پر کرپٹ ٹبر کا رونا دھوناتو بنتا ہے۔

ڈاکٹر شہباز گِل کا کہنا تھا کہ ملک کو غربت کی دلدل میں دھکیل کر بیرون ملک اثاثے شریف خاندان نے بنائے جبکہ 2002 میں ملک میں غربت کی شرح 28 فیصد تھی اور شریف خاندان کے ملک پر مسلط ہونے کے بعد 2015 تک یہ شرح بڑھ کر 36 فیصد ہوگئی۔

ڈاکٹر شہباز گِل کا کہنا تھا کہ 2002 میں 35 فیصد آبادی کو غذائی قلت اور بھوک کا سامنا تھا اور 2015 تک یہ شرح 45 فیصد تک پہنچانے والے زرداری اور شریف مافیاہی ہیں۔

وزیر اعظم کے معاون  خصوصی برائے سیاسی ابلاغ  ڈاکٹر شہباز گل کا مزید کہنا تھا کہ زلزلہ زدگان اور زکوٰۃ کے فنڈز کھانے والوں کو غریب کے نام پر سیاست نہیں کرنے دیں گے۔