وفاقی وزیر پلاننگ اسد عمر اور وزیر تعلیم شفقت محمود کی مشترکہ صدارت میں اجلاس ہوا جس میں میں رواں مالی سال کے پی ایس ڈی پی میں ایچ ای سی کے پروگرام کا جائزہ لیا گیا۔

اجلاس میں رواں اور آئندہ مالی سال تک ایچ ای سی کے زیادہ سے زیادہ منصوبوں کی تکمیل پر زور دیا گیا۔

بریفنگ دیتے ہوئے کہا گیا کہ ایچ ای سی کے 168 منصوبوں کیلئے رواں سال پی ایس ڈی پی میں 42.45 ارب روپے رکھے گئے ہیں، رواں سال 128 جاری منصوبوں کیلئے 29.74 ارب اور 40 نئے منصوبوں پر 12.71 ارب صرف ہوں گے۔

اجلاس میں بریفنگ دیتے ہوئے مزید کہا گیا ہے کہ ایچ ای سی کے 168 منصوبوں کی کل لاگت 347.4 ارب روپے ہے، ان میں 112 منصوبے یونیورسٹیوں سے متعلقہ جبکہ 16 سکالرشپ سکیمیں اور 40 نئے منصوبے ہیں اور 2023ء تک 108 ارب روپے کے 75 منصوبے مکمل کرلئے جائیں گے۔

اجلاس کی صدارت کرتے ہوئے وزیر پلاننگ اسد عمر نے ایچ ای سی اور وزارت منصوبہ بندی کی کوششوں کی تعریف کی جبکہ وزیر تعلیم شفقت محمود نے منصوبوں کی بروقت تکمیل کی ہدایات جاری کیں۔

واضح رہے اس سے قبل وفاقی وزیر منصوبہ بندی اسد عمر نے سماجی رابطے کی ویب سائٹ ٹوئٹر پر اپنے جاری کردہ پیغام میں کہا تھا کہ گزشتہ مالی سال میں پی ایس ڈی پی اخراجات ہدف سے زیادہ ہوئے ہیں۔

وفاقی وزیر منصوبہ بندی اسد عمر کا مزید کہنا تھا کہ گزشتہ مالی سال 650 ارب روپے کے مقابلے میں ترقیاتی کاموں پر 659 ارب روپے خرچ کئے گئے تھے۔ 21۔2011 کے بعد پہلی دفعہ ترقیاتی فنڈز سب سے زیادہ استعمال کیا گیا ہے، یہ غیر معمولی ترقیاتی اخراجات وزیر اعظم عمران خان کے ترقی کے عزم کی عکاسی کرتے ہیں۔