ہالینڈ کے ولارڈنگن نامی قصبے میں ایک بلی 52 روز تک ایک گھر میں تنہا بند رہنے کے باوجود بچ گئی۔

بلی نے اس خالی گھر میں کاغذ کھا کر اور پانی تلاش کر کے پینے کے بعد خود کو زندہ رکھا۔

گزشتہ ماہ کے آخر میں جب اس گھر میں نئے مکین داخل ہوئے تو وہ یہ دیکھ کر سخت حیران اور دکھی ہوگئے کہ ایک بلی جو کہ کھانے پینے کو کچھ نہ ملنے کے باعث نہایت کمزور اور لاغر نظر آرہی تھی انہیں دیکھتے ہی ان کے گرد بھاگنے دوڑنے لگی۔

نئے مالکا نے یہ گھر ایک نیلامی میں خریدا اور اس کے بعد یہ پہلی بار گھر میں داخل ہوئے تھے جس کے بعد انہوں نے جانوروں کی فلاح و بہبود کے لئے کام کرنے والے مقامی ادارے سے رابطہ کیا۔

اس ادارے نے بلی کو اپنی تحویل میں لے کر اس معاملے کی جانچ شروع کردی ہے۔

بتایا یہ جاتا ہے کہ سابقہ مالکان یکم جولائی کو گھر چھوڑ کر چلے گئے تھے جس کے بعد سے یہ بلی اپنی بقاء کی جدوجہد کررہی تھی۔