وفاقی ادارہ شماریات کی جانب سے ملک میں مہنگائی کی ہفتہ وار رپورٹ جاری کردی گئی ہے۔

تفصیلات کے مطابق ادارہ شماریات کی جانب سے جاری ہونے والی رپورٹ کے مطابق ایک ہفتے میں مہنگائی کی شرح 1.37 فیصد بڑھی ہے، ادارہ شماریات نے ملک میں ایک بار پھر مہنگائی میں اضافے کا اعتراف کیا ہے۔

ادارہ شماریات کے مطابق ملک میں مہنگائی کی مجموعی شرح 13اعشاریہ 64 فیصد جبکہ کم آمدن والے افراد کے لیے مہنگائی کی شرح 17 اعشاریہ 20 فیصد تک پہنچ گئی ہے۔

رپورٹ کے مطابق ایک ہفتے کے دوران 24 اشیاء کی قیمتوں میں اضافہ، 5 کی قیمتوں میں کمی اور 22 میں استحکام رہا۔

ادارہ شماریات کے مطابق آٹے کا 20 کلو کا تھیلا اوسط 57 روپے85 پیسے مزید مہنگا ہوگیا، تھیلے کی اوسط قیمت 1222 روپے 7 پیسے ہوگئی ہے جبکہ زندہ مرغی کی فی کلو قیمت میں 15 روپے27 پیسے کا اضافہ ہوا ،اوسط فی کلو قیمت 214 روپے 47 پیسے ہوگئی۔

ادارہ شماریات کی رپورٹ میں کہا گیا ہے کہ ایک ہفتے کے دوران گھی 4 روپے 75 پیسے مہنگا ہوا، اوسط فی کلو قیمت 342 روپے 66 پیسے ہوگئی۔

رپورٹ کے مطابق پیاز کی فی کلو قیمت میں 11 روپے 92 پیسے کا ریکارڈ اضافہ ہوا جبکہ ٹماٹر 11 روپے 36 پیسے اور آلو 68 پیسے فی کلو مہنگا ہوا جبکہ ایک ہفتے کےدوران بیف 6 روپے 10 پیسے، لہسن 3 روپے 63 پیسے، دال مسور 3 روپے 65 پیسے فی کلو مہنگی ہوئی

رپورٹ میں کہا گیا ہےکہ تازہ دودھ، دہی، مٹن، دال چنا، چاول، دال ماش بھی مہنگی ہوئی جبکہ انڈے 6 روپے 29 پیسے فی درجن مہنگے ہوئے۔

ادارہ شماریات کی جانب سے جاری ہونے والی رپورٹ میں مزید کہا گیا ہے کہ ایک ہفتے میں کیلے 2 روپے 53 پیسے فی درجن، ایل پی جی کا گھریلو سلنڈر 49 روپے 70 پیسے سستا ہوا ہے جبکہ ایک ہفتے کے دوران چاول، دال مونگ اور چینی کی قیمتوں میں کمی رونما ہوئی ہے۔