گورنر سندھ عمران اسماعیل سے پنجاب اسمبلی کے اراکین پارلیمنٹ کے 30 رکنی وفد کی سندھ گورنر ہاﺅس میں ملاقات ہوئی ہے۔

ملاقات میں گورنر سندھ عمران اسماعیل نے کہا کہ انٹر ایکسچینج پارلیمانی دورے کا مقصد ملک کے منتخب نمائندوں کے درمیان دوستانہ تعلقات ، ورکنگ تعاون اور افہام و تفہیم کو فروغ دیا جاسکے۔

عمران اسماعیل کا کہنا تھا کہ اس طرح کے اقدامات دوطرفہ تعلقات کو بہتر بنانے اور پارلیمانی سفارتکاری کو فروغ دینے میں اہم کردار ادا کرتے ہیں۔

گورنر سندھ عمران اسماعیل  کا مزید کہنا تھا کہ یہ جمہوری اداروں کو مضبوط بنانے اور عوامی مسائل کے حل اور ہماری کوششوں کو مربوط کرنے کے لیے ایک شاندار موقع ہے۔

وفد کی قیادت ایس ایس ڈی او کے ایگزیکٹو ڈائریکٹر سید کوثر عباس نے کی جبکہ وفد میں اراکین پنجاب اسمبلی میں سید یاور عباس بخاری ، ملک واصف مظہر ران، میاں طارق عبداللہ، میاں شفیع محمد، واسق قیوم عباسی، سید علی حیدر گیلانی، نواب زادہ وسیم خان، ساجدہ بیگم، عابدہ بی بی، قاسم عباس خان، محمد رضا حسین بخاری، قاسم عباس، محمد عون حمید، شاہینہ کریم، آسیہ امجد، مومینہ وحید، سبین گل خان، نیلم حیات ملک، محمد سلیم اختر ، سادیہ سہیل رانا، عظمی کاردر، سید حسین مرتضی اور شہاب الدین خان شامل تھے۔

یاد رہے پنجاب اسمبلی کے اراکین پارلیمنٹ کا 30 رکنی وفد صوبہ سندھ کے 3 روزہ انٹر ایکسچینج پارلیمانی  دورے پر کراچی میں ہے۔

دوسری جانب گورنر سندھ عمران اسماعیل نے تیسرے چیف آف نیول اسٹاف ہاکی ٹورنامنٹ سے خطاب کرتے ہوئے کہا کہ ہاکی ہمارا قومی کھیل ہے، اس گراؤنڈ سے بچپن کی یادیں وابستہ ہیں۔

گورنرسندھ کا کہنا ہے کہ صلاح الدین، کلیم اللہ اور سمیع اللہ ہمارے ہیروز ہے، آن کے ہاتھوں میں بال آنے کے بعد گول یقینی ہوتا ہے، گلیوں محلوں سے ٹیلنٹ ہاکی میں آیا اور ملک کو ورلڈ چیمپیئن بنایا۔

عمران اسماعیل نے کہا ہے کہ اسکول اور کالجز کے بچے ہاکی کھیلتے ہیں مگر انہیں وسائل فراہم نہیں کیے جاتے، ہاکی یا دیگر کھیل کروانا نیوی یا آرمی کی ذمہ داری نہیں مگر جن کی ذمہ داری ہوتی ہے وہ پورا نہیں کرپاتے تو یہ میدان میں اترتے ہیں۔

گورنر سندھ عمران اسماعیل نے مزید کہا ہے کہ پاکستان میں ٹیلنٹ کی کمی نہیں ہے بس ٹیلنٹ کو موقع ملنے کی ضرورت ہے، اسکواش میں پاکستان چیمپیئن ہوتا تھا، ہمارا اسپورٹس کے لئے ہر ممکن تعاون رہے گا۔