وزیر مملکت برائے پارلیمانی امور علی محمد خان کا کہنا ہے کہ  پاکستان میں تمام اقلیتوں کو مذہبی آزادی حاصل ہے۔

تفصیلات کے مطابق وزیر مملکت برائے پارلیمانی امور علی محمد خان نے مردان پریس کلب میں تقریب سے خطاب کرتے ہوئے کہا کہ اسلام کی قبولیت کے لئے عمر حد کی کوئی ترمیم نہیں لارہے ہیں، یہ چند افراد کا پروپیگنڈہ ہے، جس میں کوئی حقیقت نہیں۔

علی محمد خان نے کہا ہے کہ ممعاشرے کی ترقی میں صحافیوں کا اہم کردار ہے، صحافی کسی کا نہیں وہ اپنے ملک اور قلم کا ہے، پی ٹی آئی حکومت صحافیوں کے مسائل کے حل کے لئے کوشاں ہے۔

وزیر مملکت برائے پارلیمانی امور علی محمد خان نے مزید کہا ہے کہ میڈیا اتھارٹی کا معاملہ حل کی طرف جارہا ہے، پی ٹی آئی کے عروج میں میڈیا کے کردار کا اعتراف کرتے ہیں۔

اس سے قبل وزیر مملکت علی محمد خان نے اپنے بیان میں کہا تھا کہ تاریخ میں بہت سی ناانصافیاں ہوئیں، سب مل کر بیٹھیں تو ناانصافیوں کا ازالہ کیا جا سکتا ہے، وفاقی حکومت متروکہ املاک کے حوالے سے اپنی ذمہ داری پوری کرے گی، سندھ کی متروکہ دشمن املاک پر عدالتی کیسز ختم ہونے کے بعد پالیسی بنانی ہوگی۔