مسلم لیگ(ن) کے نائب صدر حمزہ شہباز نے کہا ہے کہ حکومت کے تمام حربے بری طرح ناکام رہے ہیں۔

تفصیلات کے مطابق مسلم لیگ(ن) کے نائب صدر حمزہ شہباز نے پارٹی اجلاس سے خطاب کرتے ہوئے کہا کہ نا اہل حکومت ہر پارٹی لیڈر اور کارکن کےخلاف مقدمہ درج کیا۔

 مسلم لیگ(ن) کے نائب صدر کا کہنا تھا کہ اس حکومت نے ہر حربہ استعمال کرکے دیکھ لیا لیکن ان کے تمام حربے بری طرح ناکام رہے ہیں۔ حکومت کوئی بھی الزام ثابت نہیں کرسکی۔

 حمزہ شہباز  کا یہ بھی کہنا تھا کہ میاں نوازشریف اور میاں شہبازشریف کو اپنے والد کو دفنانے نہیں دیاگیا جبکہ میاں نوازشریف کو اپنی بیگم کو  بھی دفنانے نہیں دیا گیا۔

مسلم لیگ(ن) کے نائب صدر نے کہا کہ میاں نوازشریف کا آخری وقت میں اپنی بیگم کے ساتھ نہ ہونے کے غم کا اندازہ نہیں لگایا جاسکتا۔

حمزہ شہباز کا کہنا تھا کہ اللہ تعالیٰ نے جس طرح ہمیں کنٹورنمنٹ بورڈز کے الیکشن میں کامیابی دی اسی طرح تھوڑی سے محنت سے جنرل الیکشن میں بھی بڑی کامیابی حاصل کر سکتے ہیں۔

مسلم لیگ(ن) کے نائب صدر حمزہ شہباز کا مزید کہنا تھا کہ آئندہ آنے والے الیکشن میں ہمیں اپنے ووٹ پر پہرہ دینا ہوگا تاکہ دھاندلی کی کوئی گنجائش نہ رہے۔

اس موقع پر مسلم لیگ(ن) کی نائب صدر مریم نواز نے پارٹی اجلاس سے خطاب کرتے ہوئے کہا کہ جب ہر طرف ہر لیڈر کو جبر اور ظلم کا سامنا ہے اسکے باوجود  بھی ہمیں کنٹورنمنٹ بورڈ میں شاندارکامیابی ملی۔

مسلم لیگ(ن) کی نائب صدر نے کہا کہ مسلم لیگ(ن) کتنی بڑی طاقت ہے اس کا اندازہ اس کے دشمنوں اور حکومت کو بخوبی ہے اس لیے آج بھی ان کو مسلم گ(ن) کو ہرانے کےلئے دھاندلی اور ووٹ چوری کرنا پڑتے ہیں۔

مریم نواز نے یہ بھی کہا کہ پاکستان کا مستقبل کوئی ہے تو وہ مسلم لیگ(ن)ہے، کسی جماعت کے پاس ہمارے جیسا لیڈر ہے نہ ہمارے جیسا ووٹ بینک ہے۔

مسلم لیگ(ن) کی نائب صدر کا کہنا تھا کہ باقی جماعتوں کے سربراہ کارکنوں سے قربانی مانگتے ہیں  لیکن ہمارے لیڈر نے خود قربانی دی ہے۔

مریم نواز کا کہنا تھا کہ ہمارا بیانہ ہی ہماری پہچان ہے جبکہ اگر ہمارا بیانہ ہمارے پاس نہ ہوتا تو ہم میں اور دوسری جماعتوں میں کوئی فرق نہ ہوتا۔

پارٹی اجلاس سے خطاب کرتے ہوئے مسلم لیگ(ن) کی نائب صدر مریم نواز کا مزید کہنا تھا کہ لوگ کہہ رہے ہیں یہ دھاندلی کرکے دوبارہ آنا چاہتے ہیں، لیکن میں ان کو بتا دوں اب دوبارہ ووٹ چوری کرنا ممکن نہیں ہوگا۔اگلا الیکشن ہمارا ہے اس لیے ہمیں مضبوطی اور اتحاد سے الیکشن لڑنا ہوگا ۔